【後生仔傾吓偈】借醉「執屍」係犯法　麥明詩提醒：同相熟朋友玩

今集《後生仔傾吓偈》繼續係講「狗公」，狗公通常都係被大家感覺淨係識死Chur女神，瘋狂炸Whatsapp，但原來唔止咁。大學生們就分享經驗話曾經被狗公抽水，甚至有人試過被狗公灌醉酒，最後仲借機行「兇」，估唔到依家大學生嘅尺度相當大。喺呢個時候讀過法律嘅10A麥明詩就同各位女仔解釋一下，原來「執屍」係犯法嘅：「喺法律角度如果佢醉到不省人事，而你上咗佢呢，其實係強姦嚟，因為佢畀唔到佢嘅同意你。」麥明詩重申：「Drunken consent is still a consent」，見大家聽完都唔係好明，佢就解釋：「即係你醉咗就會同意去做一啲你平時唔會做嘅事，但你唔可以賴你嗰個同意唔係一個同意。但如果你醉到不省人事，你冇任何身體上意識或者講到嘢去顯示你嘅同意，咁就唔係一個同意。」

身為港姐冠軍嘅麥明詩當然就有被「狗公」騷擾過嘅經驗，佢話啱啱讀大學迎生嗰時有一個好尷尬嘅回憶：「之前有一種手機叫「BB」，而家好少人用，嗰陣一係BB一係用蘋果，我同佢講咦你用BB嘅，咁嗰陣係我隔住條褲估嘅，佢就話你咁都睇到，你咪睇到我嘅XX。」呢段對話相當有調情意味，但後尾飯局完個男仔竟然同麥明詩講：「By the way，呢個我女朋友。」Louisa就話相當尷尬啊，跟住大學生就笑佢係自作多情，佢即刻反撃：「都唔可以咁講，佢之後都有追我嘅，3年之後。」咦，掐指一算，唔知麥明詩講嗰個係咪阿林生呢？

事後就搵到麥明詩親身回應執屍到底係咪等於強姦呢？Louisa可能因為之前被網民炮轟一事有陰影，佢利申自己唔係律師，仲引用咗港大社區法網去引證自己嘅講法，如果大家睇完覺得好驚訝，咁可能係大家對保護自己嘅意識不足喇，Louisa最後提醒大家：「同啲相熟朋友去玩，不過就算相熟嘅朋友都唔可以完全放低戒心。」