【港女講感情】陳奕迅Medley賣回憶 每位姊妹都有一張最窩心歌單
撰文：李妍樺
出版：更新：
四大樂壇頒獎禮終於結束，但大家可能冇咩感覺好似有頒過獎咁，好正常，因為自從大台冇再直播其他頒獎禮，淨係播自己個劇集歌頒獎禮，呢幾年其他好似新城、十大都好似冇咩聲氣咁。所以就算完曬全部頒獎禮，大家都好似唔係好知邊個拎新人獎，邊個拎男歌手女歌手獎。不過今年就叱咤30周年，先請到返大陸做廚師嘅Chef Le Mon出山唱《玉蝴蝶》同《活著viva》，再有神人級嘅Eason喺叱咤同十大狂唱Medley，仲正過開演唱會，最後仲有變咗人夫嘅阿王出嚟「唱這歌」，唱埋首《對你愛不完》就完滿結束。
【港女講感情】農夫氹Do姐笑到肚痛 人生有個搞笑朋友的確好極【港女講感情】靚仔壞男人已失叫座力 天然呆馬國明先係最佳男友【港女講感情】洪天明飲醉酒被扶上房？男人飲酒其實比女人更危險【港女講感情】許志安揀同鄭秀文同月受洗 行前一步走入對方世界【港女講感情】衛蘭唱功幾好都冇用 港仔只會以外貌取人
上個禮拜就被Eason同阿王呢2條頒獎禮唱歌被瘋狂洗板，幾乎個個人都share完，再留言tag朋友一齊聽，點解個回響咁厲害？因為佢賣回憶囉，大家就最鍾意想當年㗎喇，回憶總是美好的，一首歌就可以被大家倒帶返去十幾年前，成件事係幾咁夢幻。
的確，聽歌大家未必識得聽歌手嘅唱功，又或者填詞人嘅功力，大概聽嗰陣可以依稀講出首歌好聽定唔好聽，又或者啲歌詞好正咁，但歌曲伴隨大家嘅回憶就舉足輕重。
唔知大家係咪呢個generation，嗰陣好流行喺WinMX、Foxy盜版下載歌，然後大家會喺ICQ/MSN個status上面抄句歌詞，咩「°[ [-苦沖開了便淡[]-＊｝]，扮吓偽文青咁。之後放學又會約埋班friend去唱K，梗有一首係姊妹入面嘅飲歌，好似容祖兒首《去火星戀愛》或者係楊千嬅嘅《姊妹》定係最行Cookies嘅「my pen is blue, my friend is you」，全部都係回憶。
但唔覺唔覺，同你一齊唱K，失戀陪你通宵Loop《習慣失戀》嘅中同已經出嚟做嘢，甚至已經做埋人阿媽，以前一齊抄功課、煲電話粥、陪你做啲好瘋狂嘅事都只可以回憶，突然聽到Eason唱返《明年今日》，真係百般滋味在心頭。