【港女講感情】衛蘭唱功幾好都冇用　港仔只會以外貌取人

年尾樂壇出成績表，幾乎都係分豬肉咁派，所以大家最睇好尋日嘅叱咤，感覺有公信力啲。適逢尋日係叱咤30周年，所以好似擺大壽咁，搵到廚神Chef Nic出嚟揸結他唱《玉蝴蝶》同《活著Viva》賀壽，之後側田同at17又返嚟拎獎，歌神陳奕迅又孖住林海峰唱成8分鐘Medley，陳廣偉拎到最喜愛男歌手，衛蘭亦斷咗容祖兒連拎11年女歌手獎，接力做一姐，所有事情都好驚喜！大家都讚衛蘭唱得好好聽，好期待佢兩個禮拜後嘅演唱會，不過……不過大家就加句，可惜佢好肥。

成日聽人講：「一白遮三醜，一肥毀所有。」即係個人生得白，就可以補救樣貌阿、身材其他嘅缺點，相反只要你人肥，所有優點都會被你嘅肥遮掩住，大家只會睇到你肥，反正肥就係原罪！平時肥人經常都被人攻擊，話搭巴士小巴坐多一半位，應該收兩個人錢，而丹麥仲收肥人稅，總之肥人就做咩都係錯啦。

喺衛蘭之前，最常被大家攻擊嘅應該就係欣宜，可能因為佢遺傳媽媽肥姐嘅關係，基本上佢就由細肥到依家，雖然佢就冇做過咩大奸大惡嘅事，記得有次佢係頒獎禮錫咗吳卓羲一啖，全城惡搞佢個嘴好似有毒咁，話係「死亡之吻」，事隔十幾年大家都仲係攻擊佢嘅體重身形。

肥人大概喺唐朝先生存得到，生活喺今時今日嘅社會，鋪天蓋地式嘅減肥廣告，灌輸大家瘦先係靚，就係黎明一句「衛蘭肥過部電單車」，電單車基本變咗佢另一個名咁。其實人哋肥又點啫，唱歌好聽咪得囉，又要嫌樂壇冇人識唱歌，得容祖兒一個獨大，霸住個樂壇關愛座唔放，依家好喇，衛蘭復出開演唱會，等大家可以聽多啲好歌，依家又嫌人哋肥，衛蘭講過之前試過最瘦113磅嘅時候都仲係被人話肥，所以肥唔肥其實真係好主觀。大家不如去欣賞吓人哋其他優點仲好啦，衛蘭由唔識睇中文字，到唱足咁多年廣東話歌，點解唔可以讚吓佢勤力呢，香港人唔好咁mean啦！