【溏心風暴3】唐文龍大讚夏雨好戲：「我真係畀佢鬧到喊。」
無綫50周年台慶重頭劇《溏心風暴3》上集講到正爸 (夏雨飾) 知道了女兒以愛 (陳敏之飾) 同人夫Nic (唐文龍飾) 一段不倫戀之後，就嬲到要搵Nic算帳，在公司召了Nic入房之後，即拍枱兼爆粗，仲一手將杯奶茶兜口兜面潑向Nic。而戲玉就來到今晚播出呢集喇。正爸對Nic完全是感到震怒，潑完杯奶茶之後就連珠發炮咁鬧爆Nic，全程都好激動，鬧到出晒煙。而Nic就只是捱鬧無駁嘴，還向正爸道歉。不過當然無辦法撲熄正爸的怒火啦，正爸即場辭退Nic，仲好粗暴咁揪住Nic個心口掟他出房。
究竟唐文龍 (Michael) 當時被夏雨兜口兜面潑奶茶係咩感覺？總共又被潑了幾多杯奶茶呢？杯奶茶熱定凍㗎？香港01記者就電話訪問了唐文龍，由他親自講述一下拍呢場戲的感受。他說：「嗰杯奶茶係凍嘅，亦都走糖。夏雨哥係神級高手嘅演員，咁畀佢潑奶茶係我嘅榮幸。呢杯奶茶潑就潑咗一次，但係亦都加咗啲奶茶喺我頭髮同面度，因為要補shot。」原來被潑完仲要被淋多咁多次，好彩走糖啫，唔係搞到成身痴立立仲難受呀。
Michael又大讚夏雨的演技說：「夏雨哥就好好戲啦，所以佢一Take過就搞掂，在我嚟講就係做反應，嗰場戲我都唔係好多嘢講，係最尾講咗幾句。同佢互動好開心，呢杯奶茶係我近呢11年嚟最好飲最好味嘅一杯走糖凍奶茶喇。夏雨哥真係過目不忘，無論個對白有幾長，個情緒幾有立體感嘅需求，佢都一樣可駕馭得到，發揮得淋漓盡致。咁佢個正爸角色一直都係好友善，善解人意，好詳和，但去到呢場戲佢突然之間爆炸喇。」
而Michael拍呢場戲時更是被夏雨鬧到喊，他說：「夏雨哥佢嗰種澎湃同爆炸力真係快過非洲嗰隻獵豹呀，咁佢出名好戲就唔需要講啦。我當時同佢嘅互動係我入到房已經知道自己大禍臨頭，佢可以畀到嗰個壓力我，係令到我覺得膽怯，我真係畀佢鬧到喊，佢好有壓迫感，好強烈。呢個奶茶王辣嘅一面畀我見識到喇。奶茶王真係鬧到我有情緒，鬧到我流淚。杯奶茶係凍嘅，但係辣到去我嘅心頭，辣到去我嘅膽量入面。」
現在回想起來，Michael覺得拍這場戲其實都幾得意：「我哋都拍咗一段時間，因為要補shot啦，同埋因為啲奶茶乾咗，咁又要再淋啲奶茶落啲頭髮同件衫度去補色啦。呢場戲連咗兩集，所以我件衫同啲頭髮同埋撻奶茶嘖都要連戲，都連咗好多場戲，每次都要淋奶茶喺個身同啲頭髮度，都幾有趣，係個幾好嘅回憶。真係一杯令人難忘嘅奶茶，好茶，好茶，奶茶王你好嘢！」
【溏心風暴3】48歲唐文龍點解可以咁fit？ 街頭體能訓練操到爆肌