【溏心風暴3】最期待畫面出現　夏雨兜面潑唐文龍奶茶

無綫50周年台慶重頭劇《溏心風暴3》已經播出了大半，至今似乎都無咩高潮位，就算少看兩集都跟得到劇情發展。不過今晚播出的第23集終於有高潮位喇！平日一直做老好人無咩脾氣的正爸 (夏雨飾)，今集突然變得好激動好勞氣，絕對係比老婆火姐 (李司棋飾) 更火爆，可以說是演技大爆發。究竟咩事激到正爸咁嬲？就是他知道了女兒以愛 (陳敏之飾) 與人夫Nic (唐文龍飾) 的一段不倫戀。但正爸並無教訓同怪責個女，而是將責任全部推晒落Nic一個身上。

劇情講正爸同正媽知道了個女同Nic的關係之後，正爸一心覺得以愛是遇人不淑，並不知道是自己個女主動勾引Nic，完全不肯面對個女其實都有錯的事實。正爸在家裡狂數Nic的不是之後，翌日返到公司仲要當面鬧爆對方。正爸嬲到一返到公司就叫了Nic入他房，塊面黑過鑊燶的他，一見到Nic行入來閂埋門，即二話不說大力拍枱，好惡咁爆粗鬧Nic：「仆街！」 隨即一手拿起枱上那杯奶茶，兜口兜面潑向Nic，潑到Nic成面成身都是奶茶！正爸咁做似不似那些大婆走去打個第三者而不教訓自己個老公？正爸半句都無話過個女以愛，其實愛她變成害她呀。