【溏心風暴3】陳敏之堪稱女人公敵　做盡第三者最恐怖行為　

無綫50周年台慶重頭劇《溏心風暴3》入面咁多條感情線，引起最大迴響的一定是陳敏之飾演的黃以愛，與唐文龍飾演的Nic那一段不倫戀。唐文龍因為同陳敏之搭上後，就由一個好老公好爸爸搖身一變變了做世紀賤男，頻頻瞞住老婆同陳敏之偷情，仲為了同陳敏之癡纏而錯過了囡囡的比賽。真係睇到觀眾同網民好躁！不過最令人睇到激氣的就是陳敏之所演的第三者角色，今晚播出的一集她就做盡所有第三者最恐怖的行為，似乎是要迫唐文龍上絕路：就要搞散他頭家！這樣的一個角色，堪稱女人公敵，睇得各位大婆牙癢癢！

劇情講陳敏之原本約好唐文龍一齊度過情人節，因為唐文龍老婆（胡琳飾演） 當日要飛外地參加婚禮，所以唐文龍好free。陳敏之滿心歡喜咁book好酒店佈置晒浪漫大床同準備大批紅酒，不過唐文龍老婆個姨丈突然離世，唐文龍唯有應老婆要求陪她飛往外地出席喪禮。陳敏之此時已經好不滿，仲畀晒面色唐文龍睇，咋佢型。後來唐文龍氹返她說第二日可以陪她。咁陳敏之又再好開心地在酒店等唐文龍，點知唐文龍老婆突然暈倒，唐文龍要陪老婆入院當然不能赴約見陳敏之，呢刻陳敏之終於爆喇！

她一手掃晒枱上的嘢落地，之後就WhatsApp唐文龍話一定要當晚見對方，更不理可能會被唐文龍老婆發現，而駕車直駛唐文龍屋企迫對方落樓見她，仲打電話給唐文龍話如果不落樓見她，她就踩上對方屋企，好恐怖呀！其實她之前已經不理跟唐文龍的承諾，直接致電身在家中的對方。今次還變本加厲成個人走埋去對方屋企，仲話要踩上去，係男人都驚啦。唔好話做人第三者，就算是正印另一半咁癡纏其實都好易出事，作為第三者唔識趣，仲要迫到個男人咁緊要，咁死纏爛打遲早一拍兩散。