苗僑偉同老婆戚美珍拍拖時成日嘈交　分手多次依然深愛對方

一個女人最幸福莫過於有個好愛錫自己的老公，有個溫暖的家，所以三嫂戚美珍好幸福，當然三哥苗僑偉都一樣啦！三哥三嫂結婚至今多年來依然恩愛如昔，人前人後都好sweet！之不過，原來苗僑偉同戚美珍以前拍拖的時候，甚至結婚初期都成日嗌交！三哥日前接受車淑梅的電台節目訪問時，就大爆他和三嫂這些戀愛往事，仲話三嫂以前出了名是個「刁蠻小姐」，脾氣相當火爆！

三哥苗僑偉仲話他和三嫂拍拖時其實分過好多次手：「我哋兩個成日都會嘈交，大家都唔睇好我哋呢段戀情，正因為咁，我決心要將佢收服，每次分手之後都會復合。拍拖嗰段日子就好似八年抗戰咁。」就算對住三嫂呢個刁蠻公主，又分過咁多次手，三哥都依然深愛住三嫂，果然是個情深又專一的好男人呀！真係世間少有。

而每次苗僑偉同戚美珍發生爭吵，都一定會是三哥首先收火，更會主動氹返三嫂：「由我哋拍拖開始，『退一步海闊天空』呢七個字，已經深深印咗喺我嘅腦海入面，經常會用到。好在三嫂嘅脾氣嚟得好爆，都走得好爽，其實好易氹。」肯先認低威氹女人的男人，當然又要加分啦！而當苗僑偉同戚美珍到有了自己小朋友的時候，感情就愈來愈穩定了。三哥由後生到依家成60歲都咁靚仔咁有男人味，在娛樂圈打滾多年見盡不少靚女，不過三哥對三嫂由始至終都非常專一，亦唔會有咩緋聞，三哥話：「我太怕麻煩喇，亦唔花心，屋企要理嘅事已經唔少，唔會再喺出面自取麻煩喇！」難怪三嫂可以咁放心啦！