【守護神】黃宗澤苗僑偉又合作　合拍劇香港又要遲幾多先有得睇？

喺香港拍劇，基本上只有一間可以揀，鬼叫另外兩間免費電視台唔爭氣咩，演員除咗北上尋機會，仲可以同TVB有著千絲萬縷關係嘅邵氏。最近又流出邵氏新劇介紹，劇名叫《守護神》，有黃宗澤、苗僑偉同劉心悠，搵來萬綺雯老公鬼才編劇陳十三擔任編劇，係一套36集嘅現代商戰片。就咁睇陣容真係幾吸引，仲話去歐洲、東南亞，香港內地全球取景添，同內地愛奇藝合作，製作費真係鬆手啲。

之前黃宗澤同陳嘉桓分別放咗一啲，喺布拉格拍攝時嘅側拍照，仲見到女主角劉心悠以短髮造型現身，好有新鮮感。睇Bosco同三哥鬥智鬥力本身係值得期待嘅，不過睇完內容簡介就有點卻步啦「國內首次以保險理賠員為視角，追查保險事故真相……」咦，內地？乜呢套唔係香港電視劇嚟？會唔會講國語？不過大家擔心都係言之尚早，事關睇番之前嘅合拍劇都係內地播先，香港觀眾想睇呀？等下先啦。