【降魔的】做的士佬薄T短牛超神似　天然呆馬明：呢啲角色啱我做

《降魔的》雖然卡士未算好勁，但成為台慶劇，全因為題材有gimmick。有多久沒聽過TVB會拍鬼怪劇種？加上《降魔的》以的士周圍開展故事，夠貼地望帶來追看性。昨晚就播出第一集，網上評語就好壞參半，好就好在有人話節奏明快，有追看的衝動；差就差在作為鬼怪劇，第一集的鋪陳略為有點沉悶。昨晚的「亮點」就是馬明，因為由他的打扮，以及表情，都十足十成個的士佬咁。而且他載兩位賊人到貨櫃場時，驚現經典天然呆表情，無辦法叫觀眾唔好睇。

對比劇中一眾的士佬，馬明與趙永洪相對比較Young，但馬明一身薄T，驟眼望都有重陳舊感，再配以短牛腰包，還有的士佬必備的藍芽耳機，成陣味出晒嚟，真係非常貼地，由他從銀行過完數畀媽媽謝雪心走出來的一刻，完全沒有違和感，好出色。

《香港01》問到馬明做這個角色，有沒有特別向真正的士佬取經，他笑言：「冇刻意去問的士司機嘅。不過拍呢套劇時，坐的士都會特登去留意司機的行為舉止，Call咪會點講啲咩呀。有啲的士佬好型㗎，會gel行晒頭；如果架車係自己嘅呢，可能就會佈置到好靚。」不過馬明角色是個比較窮，他自己形容是比較「地」的角色：「我係入面又成日差人錢，所以一件T一條褲一條Belt就搞掂。」做得入型入格是好事，馬明講起在劇中的打扮，不禁都講一句：「其實都同我平時冇大太分別。」馬明知道觀眾了解他日常打扮風格，「我平時都係比較簡單，身上唔會配搭太多嘢…咁樣對我嚟講係好事。」雖然如此，馬明就話劇中服裝都是公司，因為：「我自己嘅衫causal得嚟…太有型喇！」相比之前《On Call 36小時》專業人士的角色，馬明之後再補充一句：「的士佬都幾啱我做…『地』嘅角色都幾啱我做。」

講到明《降魔的》，馬明透露有幾場恐怖場口，真係「又要驚又要拍」：「我記得有一場我去到荒山野嶺拍，要對住個公仔，但係我無論我行到幾遠，我都係會見到個公仔，個下真係會毛管戙…」至於係邊場，大家都要留意下。據知《降魔的》的故事，都是編劇做資料搜集而成的，而馬明在現實中都有聽過一些的士鬼故事：「就係有個夜更司機，接到個客就要夜媽媽車佢去墳場，咁都已經好得人驚喇，到最後畀錢個時，發現個客唔係畀現紙，而係陰司紙…」唔，大家又驚唔驚呢？就睇下閣下心血少唔少喇！