【3日2夜．多圖】仙氣女神又返嚟　鄺潔楹拍節目浸溫泉浸到甩皮

不知不覺間，《3日2夜》就已經播到第119集。節目中除了帶大家食和玩之外，當然不少得每一集都不少得的「浸溫泉」或者沙灘泳衣鏡頭啦。在9月23日的那一集，被網民冠稱「仙氣女神」的鄺潔楹 (Judy Kwong) 與電視機的觀眾遊北海道，浸溫泉之餘，更加有不少飲飲食食的鏡頭。不少網民睇完之後大讚Judy「夠曬自然，唔做作」、「好可愛」咁話。

當然，浸溫泉出鏡前減肥是常識吧。問到鄺潔楹 (Judy) 有沒有為了拍攝而瘦身，她接受《香港01》訪問時說：「我減肥其實冇我partner(鄭衍峰)減得咁勁，佢係節目2，3個月之前已經狂操肌。我淨係臨去北海道之前嗰2,3個星期夜晚唔食飯，我淨係食西瓜，跟住都減咗5磅。都清減咗少少先去，因為諗住去到日本可以食多啲。」

雖然Judy一早就計劃好去北海道「增磅」，但是劇組又邊會咁易放過佢呢？Judy說：「因為我差唔多每隔2,3日就浸一個溫泉，大部分都係有毛巾，有一日就係冇毛巾咁拍，而嗰日已經係成個trip差唔多尾聲，所以都唔敢食太多囉。」所以話，「塵世間最痛苦的，莫過於美食當前，而不能嚐之」。除了要節食之外，原來Judy在拍攝時出了一點意外：「我浸溫泉嗰陣唔小心跣親，跟住刮到個背脊，有少少甩皮，宜家好勤力咁搽去疤膏。」

其實今次Judy為了拍攝節目，隔２日就要浸一次溫泉，前後浸了４個，又浸溫泉浸到甩皮，真係幾慘。她說：「其實拍嗰陣都係一個半鐘搞掂。」即是拍攝溫泉時足足浸了90分鐘...其實一般而言，每次只可以浸5至10分鐘左右，而次數又不宜多過3次。所以要拍浸溫泉都唔易㗎。訪問中Judy更說：「一路拍嘅時候佢哋叫我動作優雅啲，因為我本身好粗魯。例如我坐嘅時候我個大脾擘開，因為個毛巾透透地，見到嘅時候就會有少少不雅。」