【3日2夜．多圖】鄺潔楹網友讚天真無邪　回流女神：我仲係單身

新女神誕生啦，她就是在《3日2夜》遊台中的24歲鄺潔楹，網民讚佢「GFable」，意指具有適合做女朋友的條件及特質。高登仔雖然不時對無綫劇集大肆鞭撻，但在J2播放的《3日2夜》，卻偏偏是他們的精神食糧，皆因女主持在介紹風景名勝，食玩蒲點之外，例必會有一幕幕浸溫泉的畫面，而鄺潔楹跳彈着入溫泉內，充滿清純天真味道，電暈一班宅男。

在節目中，鄺潔楹穿上襯衣熱褲，一副鄰家女孩打扮，去到新竹市一個動物園，見她相當活潑地走入動物園，不過之後要她入鐵籠，望着籠外的老虎、黑熊同狒狒，嚇到大呼小叫。其後鄺潔楹先後玩賽車及單車，不過這些都只是前菜，真正戲肉是她到達溫泉旅館，穿上粉紅色比堅尼上陣，例牌幾吓玩水動作再來一個大特寫，隨即被網民瘋狂cap圖兼洗板，大讚她「青春無敵」、「自然不造作」、「鄰家乖女」。

鄺潔楹其實剛從外國畢業回港，一直充當兼職模特兒及娛樂新聞台主持，不過平時密密實實，想不到原來是「隱藏實力」，其實鄺潔楹平日相當勤力做gym，在她的facebook專頁及Instagram內，就有大量做運動的自拍照，身型自然係勁fit兼走肥，同時亦有不少清純可人，充滿文青味道的照片，認真多元化。今次她被網民熱捧，隨時能跳出主持人框框，一嘗拍劇滋味，大家要拭目以待啦。

外形仿如鄰家女孩的鄺潔楹，其實一直想嘗試反叛女孩的角色，而拍劇亦是她新一年的目標。對於被網民大讚有女友感覺，鄺潔楹表示：「其實幾surprise有呢個意見，開頭都擔心身形會輸蝕，網民又鍾唔鍾意我呢種性格呢？因為我都幾真情流露，出嚟反應幾好，自己都好開心。」至今仍是單身的鄺潔楹，幕前性感尺度可以自己話事，但她表明只是節目需要，她自己並非行性感路線，她表示：「過去節目賣點都是在身材方面，但我就冇諗咁多，拍嘅時候也只是想健康性感。」不過女神亦開出了擇偶條件，「鍾意男仔outgoing，有上進心，知道自己嘅目標。」各位高登仔，有機會啦！