【嫁到這世界邊端】獨家訪問阿聯酋港女人妻：丈夫放我在第一位
無綫節目《嫁到這世界邊端》昨晚播出了最後一集，與前晚一連兩集的中東篇都是講嫁到阿聯酋的港女人妻Laila，與丈夫Assad以及女兒Aisha一家三口在阿布札比的生活，不過這次似乎講了好多有關伊斯蘭教和當地特色，似介紹宗教和旅遊特輯多些，反而沒有怎去細講Laila這位港女同敘利亞丈夫的愛情故事。有網民會覺得一個港女嫁到中東這麼遠，各種文化差異加上又熱又不能夠入籍，還要守這麼多規條，戥Laila辛苦。不過Laila就覺得現在的生活很幸福：「幸福對我嚟講就係簡單同滿足，我滿足於現狀，所以我覺得好開心，好幸福。」
講到信奉伊斯蘭教的Laila在節目中表示嫁給丈夫是神的主意，即有網民質疑：「吓？神叫你嫁就嫁？」但當然Laila願意走進婚姻也是基於對丈夫的愛，她說：「咁大家初相識時好感一定有，唔係都唔會繼續交往落去，作為虔誠的教徒，我哋都好清晰男女彼此應盡嘅責任，男人要照顧家庭，善待妻子同子女，孝順父母，而我丈夫全部都做得到。我就嚟結婚前開始實習伊斯蘭教嘅教義，初時好多嘢唔了解，會尊重呢個宗教，但都會有啲卻步，好唔慣。我嗰時係有個印度人老闆請我過阿布札比工作，老闆兩夫妻都係伊斯蘭教教徒，老闆娘喺香港長大，好照顧我，其實係佢哋引導我入教多過我老公。」
中東是個保守的國度，加上信奉伊斯蘭教就更加要非常守禮，情侶夫妻間在公眾場所拖手和親吻等通統無可能，然而在私底下，一樣可以好恩愛的：「我同老公當然都會做啲sweet嘢，正常夫妻生活，正常夫婦會做嘅我哋都會做，只不過呢度嘅人比較含蓄，覺得呢啲咁私人嘅嘢無須要做畀其他人睇。」Laila更大讚老公真的好sweet好細心：「佢將我同囡囡放喺第一位，每朝都會早過我起身，煮早餐畀我哋食，12年嚟從不間斷，有時我個人會好心急，好衝，老公就會提醒我要放鬆個人，陪我讀經令我冷靜返，又會叫我抖下唔好做家務住，叫我唔好煮飯出街食或者佢出街買。」其實不用甚麼大驚喜，日常生活小細節上的關愛有時更加窩心，更實在。
而Laila丈夫令她最感動的一次竟然是為了她報警：「有次我唔記得帶電話，老公搵唔到我，打晒畀我識嘅人問知唔知我去咗邊，好擔心我，我放早咗工去咗超市買餸所以遲咗個幾兩個鐘返屋企，佢就擔心到報咗警，好傻，不過亦令我知道佢真係從心底裏關心同緊張我。」至於覺得中東男人和港男有甚麼不同，Laila說：「可能我無遇過啲好好嘅港男，我識嘅香港男仔都無咩深度，中東嘅男人就好gentleman，就算唔識對方都會開門讓女性行先，揸車又會特登停低讓女性過先，女性如果有咩事只要大嗌，就一定會有男士衝過來幫你，啲男人一定會出手，好保護女性，咩都係女人啱咗先。」
那麼港女嫁入敘利亞家庭又會否有婆媳問題呢？Laila就很幸運地有對很錫她的老爺奶奶，亦曾令她非常感動，雖然兩人已經離世，但Laila仍很懷念他們：「當年我同老公想結婚，佢就打電話返敘利亞問佢父母，佢哋話『最緊要你係鍾意呢個女仔，因為你鍾意就得㗎喇。』我知道當然好開心啦，因為我好擔心佢哋唔能夠接受我呢個香港人。香港啲朋友又嚇我叫我要小心啲，搞到我都戰戰兢兢，點知佢哋好錫我好接受我。婚後我去咗當地探佢哋，有段小插曲就係有鄰居過嚟湊熱鬧，想睇下我呢個香港人新抱，姑仔講我知其中有個鄰居就問奶奶：『你娶咗個外國人新抱，要唔要娶多個敘利亞新抱？』幾衰呀！點知我奶奶答嗰個人話：『呢個新抱幾好吖，我唔知呀，我個仔覺得OK就得啦，我尊重我個仔。』奶奶呢一番說話真係令我好感動。仲有老爺平時比較內歛，點知有次老公佢哋家庭會議，老爺竟然同我老公講：『今世人做得最啱嘅決定就係娶咗這個老婆。』我聽完又係好感動。」
可能大家都會好奇當初Laila一個香港女仔要嫁到中東這麼遠，她父母又有否反對過呢？Laila說：「我媽媽好耐之前已經離世，我爸爸都有話如果我媽媽仲在生，佢一定唔會捨得畀我嫁到咁遠。我爸爸就好open minded，畀好多自由我，佢話有咩事都可以隨時返嚟佢身邊，屋企嘅門永遠都會為我打開，我好感激我爸爸。爸爸年年都會嚟阿布札比探我哋，係今年身體唔好先無過嚟，我哋都會返香港探佢。」Laila這個中東幸福人妻現在還會在facebook跟大家開心share烹飪心得，教大家煮中東菜：「我以前喺香港連蛋都唔識煎，其實我好鍾意煮嘢食，但我爸爸同爺爺都係大廚，佢哋都唔會畀我入廚房，覺得我搞搞震。係嚟咗中東先開始學煮嘢食，我好鍾意食異國嘢食，中東菜都好好味，想同大家分享一下。」
最後，講起節目中有一幕因一名伊斯蘭教女仔知悉自己被上鏡而要求攝製隊刪除影像，更恐嚇主持陳貝兒不能讓該片段出街，否則她的哥哥會飛去香港殺死貝兒，網民亦紛紛留言指TVB這樣做會害了該女子，問到Laila當日的情況，她說：「其實個女仔只係講笑，佢係笑住咁講話：『唔得㗎，唔影得㗎！』因為當地女仔對於被人影到個樣會比較敏感，但佢唔係真係發嬲，影到佢哋個樣上節目亦唔會特別影響到佢哋，畀唔畀人影到個樣完全係出於自己意願，但並唔會因為畀人影到個樣而受歧視。」