【嫁到這世界邊端】獨家訪問港女泰妻Judy：完全感受到他對我嘅愛

早兩晚無綫播出的《嫁到這世界邊端》泰國篇入面，港女Judy嫁到泰國同泰仔老公Dass定居曼谷生活的愛情故事，感動到好多觀眾同網民之餘，亦令大家對這段港泰戀充滿好奇，想再知多啲。香港01記者就獨家訪問了身在泰國的Judy，記得節目話過Judy對老公係一見鍾情，相信唔少人都好想知道究竟她點解會對老公一見鍾情，老實講Dass又唔係靚仔。Judy就解釋返其實唔算一見鍾情，反而是因為她自己自作多情才令這段戀愛萌芽。

Judy講返當時的情況都忍唔住笑：「第一次認識Dass時覺得他這個人幾過癮，之後返到香港見他成日都喺msn online等我，其實他只不過是在打機所以有online，我就自作多情以為人哋特登online等我。我們keep住在msn傾偈傾了一個月，覺得大家好啱傾，又睇得明大家的英文，他會好用心聽我講嘢，我愈來愈鍾意他，於是就趁我們都就快生日過泰國搵他。」Judy話無諗過如果求愛失敗會點：「我覺得一定得，無諗咁多。點知原來之後講返，先知原來Dass那時對我係無feel嘅，完全係零，他從未拍過拖，唔知道鍾意一個人係咩感覺。那次之後我返到香港，跟他視象他竟然喊了出來，話好掛住我，話從未試過有呢種感覺，嗰一刻我就知道我成功咗喇。」

作為一個港女，要同個泰仔拍拖仲話要嫁埋過去，唔通Judy嘅家人無反對過？Judy話：「又無話反對，不過都會好擔心，我爹地會問我究竟Dass信唔信得過㗎，媽咪又會問我嫁去泰國其實開唔開心，到結咗婚都會繼續問。我梗係有帶Dass返香港見我父母，成日見㗎，他們對Dass的印象都ok呀，會覺得他是個細路仔，我的朋友都好鍾意他。我自己都無諗過他這個泰仔會呃我，我媽咪仲話係我欺負他。」

好喇，來到唔少人都好好奇的一個問題，到底Judy覺得泰仔同港男有咩唔同呢？Judy話：「泰仔比較有耐性些，Dass真係好有耐性，會好用心聽我講嘢，我有時唔理他照在他面前講廣東話，他也會用心去聽，仲學埋廣東話添。他肯耐心等我過來曼谷探他，唔係他也不會甘願等我，早就出咗去識第二個啦。同埋Dass從來唔鬧我，無大脾氣，唔似得我以前啲香港男朋友咁會鬧會對我發脾氣。」

原來喺Judy眼中嘅Dass既唔浪漫亦唔係好細心，喺翟道翟咁熱，Dass都唔會幫Judy抹下汗，Judy笑言：「我幫他抹汗就有。」但這些Judy都不會介意，而且仲好明白同體諒老公：「他內心是對我好的，我知道。其實我們的相處好生活化，兩個人朝夕相對，他好難去製造啲咩驚喜，不過我完全可以感受得到他對我的愛，有這個老公我真係幾生修到。」嘩，係愛呀哈利！Judy話老公有時會突然錫她一啖，都好sweet㗎，講起老公錫錫，Judy記得Dass曾經呃過她：「我們初初拍拖時他絕對不會在街上錫我，呃我話泰國人一定唔可以喺公眾地方錫㗎，他驚畀認識嘅人見到，想我哋感情穩定些先。」

Judy同Dass拍拖時經常都會飛過曼谷探男友，基本上一有假就會去，後來仲辭埋香港份工，喺當地一留就留三個月，邊拍拖邊幫Dass手打理翟道翟的精品店生意，當時兩人已在商量怎樣擴展共業務，認定了對方做另一半。兩人由01年認識到拍拖到03年結婚，咁Dass係點樣向Judy求婚㗎呢？Judy表示：「無求婚㗎，唔浪漫㗎，係大家有共識，都覺得唔會係第二個㗎喇，Dass又戥我辛苦，唔想我成日香港泰國兩邊飛，想我安頓落嚟跟他在曼谷生活。Dass令我好有安全感。」嗱，相信唔少港女都唔鍾意甚至會唔畀個男朋友或者老公打機，但Judy就好贊成老公打機：「他鍾意留在家裡打機幾好吖，痴家嘛，我寧願他做宅男打機，都好過他鍾意出去蒲出去飲嘢。」港女們學嘢喇，宅男其實係筍盤嚟㗎。

可能會有人覺得Judy同老公一個月淨係開舖幾日，賺嗰萬零兩萬蚊港幣，好唔夠，可以搏命啲賺多啲，Judy卻對現在的生活感到滿足和幸福：「我們兩個都唔係好發錢狂嘅人，所以可能咁樣會活得開心啲，有時會覺得夠喇咁咪算囉，夠交鋪租咪算囉。咁係人都想要多錢啲錢嘅，但我哋嗰種生活鍾意比較悠閒啲。在於我而言幸福真係一定唔係用錢嚟衡量，唔係嘅話我就唔會嫁到嚟泰國。兩個人幸福一定要互相好深入咁了解大家心入面好深層嘅嘢，如果對方都唔明白自己何來幸福？如果大家都唔明白大家已經係好唔幸福既事。同埋大家雙方對於對方為彼此做嘅嘢會記喺心度，會心存感激。」而Judy和Dass亦正正就是這樣。