【嫁到這世界邊端】港女喪姊到泰國散心　尋到生命中的守護天使

唔知係咪因為發生喺香港人第二個鄉下嘅泰國，所以大家特別有共鳴，無綫節目《嫁到這世界邊端》日前播出一連兩集的泰國篇，就引起好大迴響，港女Judy同泰仔老公Dass的愛情故事，感動到唔少觀眾，好多網民都留言話睇到喊，又大讚Judy為追求真愛可以不顧一切，為自己的幸福努力爭取好勇敢，又為Judy和Dass送上祝福。尋晚嗰集個洋蔥仲大粒過前晚，Judy憶述她家姊患抑鬱而自殺，講到聲淚俱下，真係好touching，Judy自己睇返呢集都話喊到豬頭。

Judy由細到大都跟她的家姊感情要好，可惜在8年前她家姊因為抑鬱自殺輕生，令Judy整個世界都變了：「這件事完全影響我之後的人生，我以前是一個幾開心嘅人，自從我家姊出事後，我就非常之唔開心，我家姊當我是她最好的朋友，大家會互相鼓勵。我真係好掛住她，每一日都好掛住她，從那時開始，我每晚都睡不着。」

承受住喪姊之痛的Judy，在家姊過身幾個月後決定到泰國散心，想不到此次散心之旅卻讓她遇上了真愛。緣份就是咁奇妙，Judy的家姊生前也很喜歡泰國，去當地的次數比Judy還要多，Judy竟然在這個時候，於這個地方遇上Dass，令她感到就似是家姊派Dass來守護她，照顧她，令她暖在心頭：「Dass都話可能我家姊真係守護住我，看顧住我，先會慢慢為我鋪排條路要點走。」而Dass亦同樣相信是緣份將他和太太牽在一起。話晒一個居於香港的港女同一個居於曼谷的泰仔可以話係大纜都扯唔埋，唔係緣份係咩？正所謂千里姻緣一線牽，可能就係Judy的家姊在天之靈為妹妹和Dass牽上紅線。

講到Judy同Dass在曼谷的生活，他們用港幣50萬元就買下了一個300多呎的住宅單位，仲要唔使畀首期，50萬喺今時今日嘅香港真係連首期都未必畀到呀，泰國呢個價錢就可以置業實在令人好心動。而他們兩公婆靠經營喺翟道翟的精品店，每星期淨係開星期六、日兩日，一個月開8-10日就有大約港幣萬多兩萬蚊的收入，喺泰國呢個物價指數同生活指數相對較低的地方，已經好好使㗎喇，仲可以日日食港人至愛嘅泰國地道美食，例如豬手飯、泰式雞飯、生蝦刺身、Pad Thai同芒果糯米飯等，所以都有網民留言話好羨慕Judy。如果真係可以好似Judy咁找到真愛，其實嫁到泰國又使乜驚喎。