【同盟】姚子羚100磅23吋腰圍減肥法：晚晚要飲一壺湯先瞓
TVB正在熱播的劇集《同盟》中，與陳山聰飾演情侶的姚子羚每集都著住緊身裙，仲要同山聰有激吻場面，睇到不少網友都熱血沸騰呀真係！咁又係嘅，化妝同減肥是女仔的終身事業， 子羚就話比較着重底妝，「因為皮膚唔好係好難上粉，所以日常生活中應該注重多啲內裏嘅嘢，調理好身體，皮膚好就會容易上妝。」她透露首先會揀適合自己膚色的粉底,「我的眼妝比較難化，要用半小時。我都想試下現時韓國嘅裸妝。」咁點樣先可以化到個靚妝？當然要先從飲食着手喇！
不要一餐食到好飽，每次食到七分飽就最好喇！
姚子羚透露在澳洲讀書時是「肥妹仔」一名，體重試過130磅，「那時去讀書好開心，乜都唔理，而且有經常食junk food（高熱量低營養食物，俗稱垃圾食物）。」其後就因為回港工作所以漸漸消瘦，現時只有100磅、腰圍23吋嘅佢，透露減肥秘訣是少食多餐，「我一定會食早餐，同埋我習慣每朝一起身會先飲一杯暖水，然後食一些水果才食早餐。」近年她因為不想殺生和受男友同姊姊的影響而茹素，這個習慣維持了快兩年，「我唔會揀肥膩嘅食物，會食好多蔬菜，而飯我會食一碗仔，盡量少食澱粉質。」
食早餐都咁有規律，咁午餐同晚餐呢？子羚笑言自己其實乜都食，「熱氣嘢同埋汽水都會食和飲，我覺得偶爾間食係無問題，當然唔係叫你暴飲暴食，間唔中獎勵下自己。如果你lunch食少咗，咪夜晚食返多少少，但就唔好有一餐係食到好飽，每一次食到七分飽就最好喇！」拍戲拍得咁辛苦，宵夜一定少不了，子羚指食宵夜係同同事最好嘅溝通橋樑，「因為平時拍劇同事都會一邊食宵夜一邊傾下一陣點拍，但我嘅宵夜就係食菜，唔食油膩嘅嘢，都係果句間中食就可以。食完就一定要做運動。」連宵夜都食得咁健康，真係抵你有23吋腰！
每日返工帶杯花茶傍身
而姚子羚就話自己幾夜收工都要飲一壺湯才瞓覺，「其實煲湯就唔難，好多素湯都好好飲，我最鍾意就係紅菜頭粟米蘿蔔湯，好清甜。同埋我每日返工都會帶一杯飲品傍身，例如係花茶，紅棗茶，花旗參茶。」她笑言雖然識煲湯，但就好少煲俾男友飲。除了飲得之外，運動都好重要，眾所周知子羚熱愛跑步，原來間唔中都會去做下Gym，但現在佢最想做嘅運動就係打拳，「因為拍《同盟》都上咗好多堂，我應該會再學，始終俾咗錢，希望唔好唔記得啲動作。」會不會同男朋友一齊跑步做Gym呢？子羚就即刻露出幸福的笑容，「佢會係屋企做運動，我嘅跑步腳多數是李施嬅同豹嫂，之前去澳洲拍節目仲一齊早上去跑！」各位Sis，睇完姚子羚嘅keep fit秘訣，仲唔即刻去試下？！