【踩過界】李佳芯終於床戰張振朗　第二季新挑戰：最緊要做得舒服

《踩過界》下星期就來到第二季，除了大家引頸以待的千雪BB，當然還有李佳芯的床戲。上回有講到李佳芯與王浩信在床上激戰，偏偏蔡思貝就在床下底聽到整個過程，真是心都噏埋。床戲又豈只一幕？原來李佳芯與張振朗還有段更激的。

兩人的情感其實好有鋪排，先有張振朗教李佳芯如何防狼，有由後箍緊，又有意圖索吻。其後兩人玩Role Play，醫生與病人、風紀與學生、最後仲做埋法官，唔知呢啲係咪熱身。之後兩人真正有床戲，先有碼頭擁吻，後有舞池夜蒲，再直落回家親熱。驟眼所見，這場戲非常肉緊，李佳芯被張振朗推埋牆魚肉，不過女方越來越主動，坐上張振朗的大腿，然後…就沒有然後了。鏡頭一黑，轉到別的場景。相信是內地播放尺度有限，所以更激的場面或被刪掉。如果想睇足本版、就要等TVB。

李佳芯接受《香港01》訪問時，講到拍床戲前做足準備：「事前梗係打定底先喇，到真係拍嘅時候，咁除極都會仲有吖嘛。」除了打底，同對手都會有詳細溝通：「會傾下個位係要點做，最緊要大家都做得舒服，So Far同佢哋都ok嘅。算唔算最大突破？我角度就梗係激喇，自己從來都好少做主動嘅，咁偏偏今次我就要咁主動…都好嘅，其實每個角色都有突破，對演員都係好事嚟嘅。」佳芯BB仲話見到網民話佢夠放，其實係好事：「我成日都擔心自己唔夠放，不過都唔擔心之後會越做越難，只要係適合、要求合理，都係最緊要做得舒服，如果係唔合理，做得唔舒服嘅話，其實就冇意思。」

後來李佳芯講到《踩過界》收視似乎不太理想的問題，她說：「其實今次安排在星期六、日播放，都預咗收視可能唔係咁好，不過希望Keep住有noise，等大家都會因為noise去留意套劇。」不過，佳芯BB都知道有不少網民已經知道結局，得知Never的最後下場，表示驚訝。話咁快畀人睇晒，好似唔係咁好喎，咁點算呀？都係嗰句，唯有等TVB的一刀不剪版喇！