【踩過界】林韋辰陪母親走最後一程 感嘆：做演員有時要放低情緒
《踩過界》除了題材新穎，同時見回熟悉又陌生的面孔，說的就是第2次返TVB的林韋辰。30年來的演藝生涯，曾經憑着《再見豔陽天》奪得亞視視帝，再來回往返TVB、亞視，又到大馬、內地發展。十多年後再回到娘家，有高層親自出手，招他回到TVB做親生仔，不過，最終極的原因，林韋辰當時猶豫地想了想，再深呼吸一口氣，徐徐說出來。
攝影：梁碧玲
林韋辰先有TVB高層余詠珊提議回巢，後有樂易玲說服簽經理人合約，拍完劇後更得到珍姐曾勵珍賞識，叫他「親生仔」亦無懸念。只不過他聽到這3個字就嚇親，說：「冇講到咁誇張，嚇死人咩！高層都只係覺得而家係需要人嘅時候，見缺人咯，咪按照公司運作去搵合適嘅人囉，所以先至搵我。」
不過講到尾，得到高層器重值得開心，更何況對方是珍姐？林韋辰說：「我記得珍姐同我傾偈，除咗好搞笑咁問我係咪戴咗假髮之外，佢睇完《踩過界》見到我，就話：『做得好好喎！畀啲心機！』我就已經好滿足。」
亞視人出現TVB，多數都會有隱憂，就會被觀眾嫌「亞視味太濃」。林韋辰聽罷笑言：「我最怕畀人話我大陸味濃啫！都有人話我無綫味濃㗎啵！其實邊有分亞唔亞視？電視台台前幕後，都係游走唔同電視台，唔做亞視，就係做TVB，呢個都係必然嘅事實，如果真係要話我亞視味濃，咁無辦法喇！但每次有亞視人去TVB，都一定有迴響，就好似游生（袁文傑）咁，佢人氣都高咗，我都要恭喜佢！」
陪她走到最尾……
曾經做過「亞視視帝」，又試過到內地、大馬多處發展，上面油水多、機會多，不少人去了就不願回來，為何林韋辰事隔數年，決定折返到香港呢？真的純粹TVB缺人嗎？林韋辰想了想，說：「其實喺出面都跑得幾攰下喇，咁一直以嚟媽媽身體都唔太好，要進出醫院，就決定返到香港，方便照顧佢。」直到拍攝《踩過界》中途，林韋辰母親離世，他哽咽地說：「做演員係要放低情緒，我記得媽媽走之後個日，我同Ali（李佳芯）仲要拍談情戲，要笑住咁。後來我都有同阿Lam（監製）講起呢件事，希望佢唔好介意，你問我返TVB第一套劇深唔深刻？一定係好深刻。」雖然林韋辰媽媽無法看到兒子最新作品，但在林韋辰心目中尚算無憾：「記得當日我唔使返工，我就可以陪足媽咪一日，然後睇住佢走，能夠同佢行到最尾，已經好好。」
過往林韋辰在內地發展，沒有太多時間見屋企人，他講過：「試過成年都見唔到佢哋。」這會否都是林韋辰的遺憾？「或者都係一個無奈，人哋話一個人有幾個黃金20年，要必須做一啲嘢，為自己、周邊嘅人、屋企人都要照顧。始終冇可能完住放低晒所有嘢陪屋企人，媽媽都理解，同時都唔想我太辛苦太勞碌。」媽媽對兒子做的任何一個決定，都無限量支持，媽媽簡單一句：「保重身體」，卻是讓林韋辰最深刻，「佢成日都咁同我哋講，但最需要保重身體嘅人，就係佢……而家，係就係睇唔到，但佢之前都係咁翻睇我啲戲！喺以前亞視歲月流聲…」在最後，林韋辰再說：「冇計喇！人生係咁。」