【踩過界】被SM硬塞落水好辛苦　蔣家旻：三個幾月情緒都好低落

一星期兩集的《踩過界》是單元劇，剛講完盲俠王浩信幫行為藝術家的譚凱琪打甩攻撃他人身體條罪之後，昨晚就開展另一個故事。話說飾演啤酒妹的蔣家旻離奇失蹤一個月，後來就被張振朗發現她潛入單立文屋企疑似偷竊。蔣家旻就開始陷入驚恐，情緒失控。而今晚的劇情就會交代到蔣家旻原來被許家傑捉走，走入對方的密室，發現原來掛滿禁錮工具，蔣家旻消失了一個多月，原來就係被人SM。

講得SM，就會有不少禁錮場面，當中蔣家旻仲要被許家傑捉住個頭落水，狀甚痛苦。據知拍完一連串的虐待場面，蔣家旻的心情很沉重，她說：「拍之前，睇劇本時係好有壓力，因為角色好大挑戰，每次睇劇本都覺得好難代入角色，始終現實生活無類似經驗，所以會好想逃避睇劇本，有時會影響現實生活既情緒。拍嘅時候，環境，對手，同禁錮嘅動作場面，有種真係似被虐待嘅感覺，所以慢慢愈來愈容易代入角色。同時盡量唔同人講野，亦唔比其他人影響，keep住心情低落，否則會好易抽離。」

講到捉住個頭落水，蔣家旻坦言落水次數多到唔記得，只記得過程辛苦：「要邊做爭扎邊留氣慢慢呼吸，對手有錫住我，唔會太用力，所以我要自己演繹，而且有時浸得唔夠深，又要再拍過，所以劇播好快，但一個鏡頭拍好多次，我都浸咗好多次。」拍完之後會否怕咗水？她說：「恐懼就冇，但嗰排見到洗手盤或浴缸，都好容易諗起劇中嘅畫面。」

現在講起SM，就會好容易想起電影《格雷的五十道陰影》，同樣都是以禁錮為題材，蔣家旻笑言有朋友都會將她所演的聯想到這套電影，自己看過之後，表示：「真係好似《格雷》。刑具、SM、斯德哥爾摩症情節都有啲類似。同埋《踩過界》係IIB啫！」原來，她為演繹斯德哥爾摩症後群的效果，搞到要避世：「盡量都唔想出街，因為唔想令到自己好興奮，當然有時都會出，但出完之後，第日都會拎返劇本睇，要搵返劇中嘅世界，逼自己搵到斯德哥爾摩症既感覺。脾氣都有影響，會差咗，因為會想收埋自己，唔想有人打擾。拍完好快抽離，因為角色令我3個幾月都情緒好低落，同有無形壓力，所以都會期待快啲完成呢套劇。」TVB好少可拍SM場面，一來畫面踩界，二來怕觀眾接受唔到，不過蔣家旻就話：「好彩睇劇本時覺得唔係太誇，所以拍時都唔會尷尬，觀眾應該接受得到。」

拍得咁辛苦，蔣家旻反而好開心，因為除了《愛·回家》的馬子妮，她終於有其他突破：「我開心拍到《踩過界》，至少遇到一個超越馬子妮既角色，唔會比人認為我只做到馬子妮呢類角色，都想再有多啲有挑戰性嘅角色。」