老細叫兩餸飯慶公司週年宴　$800埋單引熱議　即刻遞信VS好食咪得

臨近年尾，不少公司都開始慶祝週年宴，有老細會安排去食自助餐，有老細則安排去Party Room，而在今年似乎掀起了另一風潮，有老細預訂兩餸飯來慶祝週年宴，$800就輕鬆埋單，引起網民熱議。有人認為好味就可以，有人則指要即刻遞信！

老細叫兩餸飯慶公司週年宴　$800埋單引熱議　即刻遞信VS好食咪得

有網民於社交媒體Facebook「香港兩餸飯關注組」中發文，分享一個公司週年宴到會選擇，餸菜款式並非常見的意粉、肉丸及沙律，而是港人常吃的中式兩餸飯。多款餸菜以錫紙兜裝起，款式都算多，包括西蘭花，咖喱雞肉、炸豬扒、唐醋排骨等，份量目測相當多，更形容味道好味過大餐廳，價格聲稱只不過$800齊頭，CP值實在高。

相關貼文引起巨大迴響，至截稿為止引來逾700個讚好，有網民留言大讚「正到癲！咁樣先800......蝕住做」、「好過叫埋d聖誕餐......沙律......串燒......拼盤果啲，又貴又唔夠食」、「幾有創意丫，好過一圍圍」，亦有網民指「可理解為叫小菜」，又表示「其實食小菜都唔錯呀」，普遍多正評，更紛紛要求樓主「好人做到底」，留言分享訂購方法。

有網民將該貼文截圖轉發至LIHKG討論區，有網民見到這別具特色的「兩餸飯週年宴」，即刻回應道「小妹一定即刻遞信」，卻引來逾50個負評，更被鬧：「咁好餸都唔知足⋯⋯係咪要叫韓國鹹菜醃菜、歐洲生冷蔬菜，先叫高級」，亦有人話：「好食過酒店自助餐，$800抵，同事一定食得開心」、「有無地址，有得諗」，最終亦引來不少網民青睞，想預訂慶祝聖誕！

據社交媒體Facebook「香港兩餸飯關注組」貼文樓主分享，提供兩餸飯到會的是「香港人兩餸飯」，地址位於鰂魚涌一帶。