黃翊搵何哲圖傾演唱會？　老婆潑冷水：網民話睇但唔買飛就出事！

黃翊自從在《流行金曲50年》獲極大關注後，曝光率大增，好多歌迷都好期待黃翊之後可會再出新歌，甚至開演唱會。黃翊之前就有講過有意推出新歌，而看黃翊這幾天的Facebook的更新，這件事似乎好快會發生，事關他近日不斷上載在studio拍攝的相和圖，今日更與星夢娛樂老闆何哲圖約見，合照寫到明：「今日同TVB高層 Herman傾正嘢。」

過去一直有傳星夢旗下的鄭俊弘因與何雁詩的緋聞，搞到原定7月舉行的紅館個場要急殺停，有歌迷見到黃翊與何哲圖會面，甚至推測黃翊會否頂上開騷。

事實上，現已是大牌檔老闆的黃翊最初是有點抗拒再唱歌的，他早前接受電台訪問時，更自爆初初收到節目組電話時，擔心到不回電話，到答應了上節目又忘記歌詞：「個時要打畀啲死忠Fans問，佢哋話搞錯啊，自己作嘅歌都唔記得。」後來上了節目人氣急升，黃翊才敢相信上天留給他的第二個機會：「其實我不嬲都ready好，因為我對唱係有團火，不過已經熄滅咗，廿幾年前好想係音樂上面做啲成績，咁但係呢發現當時睇唔到，好多人都只係睇到某幾位既努力。」

黃翊坦言現在做的事，最想自己可以覺得舒服、開心和有家人支持，他又表示現在不時會收到人邀請他再唱歌和開唱演唱會，談到可有對此心動？黃翊笑言：「我老婆份人就保守啲、踏實啲，佢就叫我唔好信，個啲人通常喺網上面講就話去睇你，到時佢哋唔買飛你就出事喇，我就話係喎，唔好亂嚟！」雖然未知開演唱會成唔成事，但見黃翊上載Studio的相也可以相信，他正為音樂做準備。