【每逢大事講故事】家姐唔易做 朴槿令專注跣足朴槿惠30年
韓國前總統朴槿惠倉皇下台，又應驗韓國總統冇好下場嘅詛咒。有人可憐佢成為階下囚後，只可以食價值1443韓圜（約10港元）嘅簡單午餐，只得白飯、菜、菜、同菜，好似牛牛只食草；相比以往一餐國宴都20幾萬美金（約百多萬港元）嘅日子，實在太大落差。
不過佢過去幾十年食飯基本都「背脊骨落」，多得佢妹妹朴槿令出盡吃奶嘅力去跣佢，監倉飯可能先係佢過去幾年難得一次嘅安樂茶飯。
朴槿惠係一個悲劇女主角，22歲母親被殺，就要夢想都放棄，由法國返回韓國，代替母親充當「第一夫人」嘅角色。幾年後連父親朴正熙都被殺，但佢冇時間傷春悲秋，接到死訊第一句問：「前方（三八線）有冇動靜？」第二句呢？冇第二句喇，因為佢要冷靜，仲要顧住啲細佬妹，仲要顧住國家。
死老豆喎！可以咁冷靜？係呀，呢個故事流傳到而家，一直係朴槿惠粉絲力證佢係總統人才嘅理據。佢喺自傳中回憶，當時親手清洗父親沾滿血迹嘅襯衫同領帶，又諗起母親被殺後，都係自己清洗佢染滿鮮血嘅韓服。
歷代總統都冇好下場？請睇：
之後朴槿惠離開青瓦台，全斗煥接替朴正熙上台後，開始批判朴正熙嘅獨裁統治。不少朴家親信都首當其衝，朴槿惠曾經相識又親密嘅人，都成為陌路人。有次佢喺酒店電梯見到父親嘅舊部下，好高興同人哋打招呼，點知對方當佢冇到，真係傷透佢嘅少女心。就係呢啲經歷，令朴槿惠變得堅忍同堅守原則，同時亦開始唔信人。
不過父母橫死、人情冷暖，都唔係最令朴槿惠傷心；真正令佢食唔安坐唔落嘅，反而係佢兩位最親密嘅人：一個係感情好到似真姊妹，但冇血緣關係嘅崔順實；一個係血濃於水嘅真姊妹，感情卻只如路人嘅朴槿令。
崔順實點樣令朴槿惠頭痕大家都好清楚，唔清楚都可以介紹番：
你以為咁叫誇張？No！你睇得太少韓劇喇。朴槿惠妹妹朴槿令先夠經典。話說朴正熙同妻子陸英修有3個仔女，長女槿惠、次女槿令、幼子志晚。朴槿令原本唔叫朴槿令，佢出世時叫朴槿瑛。朴槿瑛畢業於京畿女子高中，又喺著名學府首爾大學主修作曲專業，配埋佢年青時清秀嘅樣貌，真係有種脫俗塵嘅少女味道，喺韓國係有名的「名媛花旦」。
你以為#有妹的孩子像個寶？果個只係一個夢......
自古以來，好多姊妹、特別係上流社會嘅名媛，都係互相睇對方唔順眼。好似美國已故總統甘迺迪嘅夫人積琪蓮甘迺迪同佢妹妹Lee Radziwill，曾愛上同一個男人，即俗稱爭仔；英國女王伊利莎白二世嘅妹妹瑪嘉烈公主，多年來不斷與小鮮肉鬧緋聞，瑪嘉烈公主回應：「兩姊妹中如果有一個做咗女王，另一個就唯有集中做啲有創作性嘅壞事。」用中文講即係擺明作對。
想知積琪蓮甘迺迪點同妹妹爭仔，可以睇番：
▲真正嘅好姊妹係咁㗎！
來到韓國，就有朴槿惠同朴槿瑛姊妹。咁朴氏姊妹爭咩？
首先要睇番兩姊妹嘅恩恩怨怨先。朴槿瑛同姐姐關係本來都唔錯，1982年，當時26歲的朴槿瑛，同韓國財閥之一、豊山金屬創辦人柳纘佑嘅長子、33歲的柳青結婚；不過冇幾耐就離婚。婚姻失敗可能係朴槿瑛嘅思想突變嘅時機，自此之後佢就同家姐朴槿惠處處對着幹。
點解會思想突變？朴正熙死時，朴槿惠同朴槿瑛其實都係廿幾歲嘅成年人，講「長姊為父」或「長姊為母」就老土啦，但偏偏朴槿惠唔知係護弟妹心切、責任感上腦，定係控制慾過剩，對細佬妹嚟講就係擺起個家姐款。而且多年來朴槿惠喺朴正熙身邊出盡風頭，相反朴槿瑛雖然係有名名媛，但名氣始終唔及姐姐同弟弟，唔係亂講㗎，韓國版維基百科Namuwiki都係咁講㗎。
咁朴槿瑛點跣朴槿惠呢？
五大跣位：
一、迫姐姐退出福利機構
陸英財團是姊妹決裂嘅開端。陸英財團係兩人嘅媽媽陸英修創辦嘅兒童福利機構，1982年朴槿惠開始出任陸英財團理事長一職，一直都相安無事。直至1990年，朴槿瑛發動「政變」，號召支持她的成員投票，罷免朴槿惠理事長職務。攪咗兩年，朴槿惠最終被迫下台，由朴槿瑛上位。
二、與姐姐對手結婚
到朴槿瑛40歲時，話因為唔好意頭改咗個名叫朴書永，10年後又再改過個名叫朴槿令。如果朴槿令係俾錢人幫佢改名嘅話，咁真係可以叫佢回水。因為改咗名之後，朴槿令都好似冇咩長進。
2007年朴槿惠角逐大國家黨總統候選人競選時，朴槿令竟然手指拗出唔拗入，同一樣參選嘅白石大學教授申東旭訂婚。首先，申東旭細過朴槿令14年，朴槿惠真係接受唔到囉；申東旭啲私生活又過份精彩，2004年同前妻離婚，2006年同朴槿令交往，但同時前妻又幫佢生咗第二個小朋友。
朴槿惠落台後，大選即將舉行，更多內容請睇：
數學題：究竟申東旭前妻幾時開始懷孕呢？真係耐人尋味。
咁樣嘅人朴槿惠完全信唔過，知道妹妹要同佢結婚，直頭嬲到連婚禮都冇去。但朴槿令堅持同申東旭喺2008年結婚，自此之後兩人就拍住上，一齊以跣朴槿惠為人生目標。2009年申東旭轉做鍵盤戰士，喺網絡上發表誹謗朴槿惠嘅言論，包括話朴槿惠搶走咗陸英財團。最後申東旭誹謗罪成，被判有期徒刑1年半。
三、不顧民情 亂噏親日言論
近年來，朴槿令繼續同姐姐作對，但唔係循正途，係靠亂噏。2015年，朴槿惠同安倍會面時談到慰安婦問題，爭取日本首相安倍晉三道歉，但朴槿令就同姐姐唱反調，話韓國不應該就慰安婦問題持續要求日本道歉，日本冇必要對就此問題賠償，又話參拜靖國神社係日本內政。
▲韓國人應該想問朴槿令：「你冇__嘢呀？」
四、參選議員 攞老豆家姐助選
舊年佢仲參選議員，如果靠佢自己當然係冇人睬佢啦，佢今次唔玩政變唔玩結婚，佢玩「老豆」。佢喺競選海報上印埋朴正熙個樣，宣傳口號係「以父之名」。
▲飛雲要送佢一首歌。（Youtube）
人哋問佢參選理由，佢就話：「家姐做總統好辛苦㗎，我想幫吓佢！」擺明車馬擺老豆、家姐上枱。唔單止咁，佢仲提出「性交易合法化」、「將親朝左翼人士強制移居至朝鮮」等等出位嘅政綱。其實你唔拖累家姐，已經好感激喇。
五、踩多腳 話崔氏父女影響姐姐
當朴槿惠捲入密友干政風波，申東旭又出嚟加多兩腳，話朴槿惠因為親近崔順實，所以先同親妹疏遠：「我老婆同朴槿惠一齊住時好親密，有時我老婆仲會做埋司機、秘書、形象顧問。但我老婆（同前夫）結婚之後搬咗出嚟，崔氏父女就乘虛而入。」仲話：「佢哋已經係朴槿惠的手手腳腳。」
想睇更多朴槿惠新聞，請睇：
朴槿令最新玩法，係喺彈劾案判決之後，走入挺朴民眾一齊示威，攪咩呀？
多得兩位專注跣朴槿惠多年，朴槿惠可以話冇覺好瞓。所以比較上嚟，細佬朴志晚吸毒都唔算係咩囉。
就好似《孤獨的美食家》所講：唔被時間同社會束縛，幸福咁填飽個肚，短時間內變得隨心所欲，變得「自由」......是現代人最大治癒！可能屬於朴槿惠嘅自由，免受妹妹侵害，真係要喺獄中先搵到。
繼續聽飛雲講故仔，請睇呢度：