【拆彈專家】劉華未康復缺席記招　姜皓文：佢負責好多嘢似副導演

以真實炸彈發現案為藍本的《拆彈專家》，不惜斥資1.8億打造，當中最大賣點當數1:1紅隧搭景。在灣仔香港國影視展的發布會上，導演邱禮濤、演員姜皓文、吳卓羲、蔡瀚億BabyJohn、石修及駱應鈞等現身與傳媒會面講解是次製作，並即場解構「紅隧是如何建成」。

紅隧海底隧道車水馬龍，接通香港核心地帶，邱禮濤解釋在這裏埋藏炸藥是「因為紅隧與香港市民息息相關，加上未有人咁樣用過，造成的社會震撼性大。」每逢與炸彈相關的電影，大場面一定唔少得，邱續指：「拍攝時摧毀咗二百幾架車，係我從影以來次數最多。」聽落都覺得轟轟聲。

在戲中的紅隧依足真景來搭建，不論在顏色、質感及細緻位都做足工夫，姜皓文表示因爲太真，連上蓋都要封密：「不單吊威也難，入面其實仲好侷。」可想而知拍攝與建造紅隧的過程同樣艱鉅。

至於監製兼主演的劉德華仍在休養背傷而缺席發布會，談及與劉德華的合作時，姜皓文話：「華哥佢在片場著件T恤行來行去，負責好多嘢，我開玩笑講我哋請咗個好貴的副導演。」而在戲中擔任劉華助手的吳卓羲表示深受其做事細緻精神所影響，最後導演邱禮濤亦代表劇組祝福華仔早日康復，「我知道他早了出院，現在仍在休養，坐低無得挨都唔得，我喺度引用五四文學的話用語，祝佢盡快可跑跑跳跳，談談笑笑。」