麥浚龍被遺忘之作　《保衛戰隊之出動喇！朋友！》其實係超英片

麥浚龍Juno未做導演前，其實都係一個演員，雖然作品不多，但大家都應該記得他在《破事兒》中，飾演鍾欣潼的老公，由車房仔做到大老闆的飛鷹。
其實Juno都有做過主角，今次介紹的就是由黃精甫執導，鄧麗欣、曹格、溫超（即有段時間大熱的A貨星爺）主演的《保衞戰隊之出動喇！朋友！》（2011），今時今日睇番，仲驚喜發現原來有位影帝級人馬飾演終極大佬。

電影開拍時名為《小雙俠》，這是取材自80年代一套日本動畫的名字，但看過該片的，便發現戲中向日本動畫致敬的，應該是《宇宙大帝》，一個講三個機械人合體殺敵，保衛地球的故事。電影更用了張國榮主唱的主題曲《宇宙大帝》作主題曲。至於戲名《保衞戰隊之出動喇！朋友！》點解要改到咁撓口，原來是導演黃精甫意思。

這是黃導對卡通片《宇宙大帝》的回憶，因為三位主角每次出動都會大叫一聲︰「出動喇！朋友！」所以特意將這句對白放入戲中，並成為戲名。黃精甫之前的執導作品有《江湖》、《阿嫂》，後來亦有跟麥浚龍合作過《復仇者之死》，電影與Marvel冇關，反而是有AV界天后蒼井空做女主角。