【Cult片】麥浚龍煲住血腥片《鐵甲威龍》長大：細路仔唔應該睇

講起Cult片，真係不得不提麥浚龍（Juno），因為佢的確係香港地裏面數一數二嘅專家。喺加拿大煲Cult片長大嘅佢就曾經喺佢阿哥麥浚翹主理嘅雜誌《Milk》裏面寫過三年專講Cult片、B片嘅專欄《Wasteland Treasures》，介紹過好多香港人唔熟或者睇漏咗嘅電影，令讀者大開眼界。結束咗專欄後，Juno就開始專心寫劇本、拍戲，先後執導《殭屍》（2013）同警匪片《風林火山》（預計2018年年末或2019年上映），係好間唔中先寫下稿講其他片。

幾年前入戲院睇《殭屍》嘅時候，真係覺得好驚，一來係劇情、畫面都好恐怖，特別係吳耀漢嘅殭屍造型同陳友扭羅庚扭到手斷一幕，到依家都仲記得好清楚；二來係首次執導嘅Juno即使係以拍到爛嘅殭屍片做題材，都能夠呈現到自己嘅Cult爆美學，執行上都比好多新導演成熟得多，所以真係好有衝擊。

咁到底影響得Juno最深嘅Cult片係邊套？佢嘅電影美學又係點樣形成呢？早前好好彩可以喺一個品牌活動上捉到Juno問兩句，當我同佢講到上述部分時，佢嘅答案令我有啲驚訝：「係《RoboCop》（鐵甲威龍），呢套電影係我細個翻睇得最多嘅戲。」當時我第一時間就諗，明明《鐵甲威龍》好大路吖，點解會係一套Cult片，我想問點解時，佢就繼續講：「其實佢唔只係一套Cult片，佢野心好大，架空一個世代出嚟，裡面有自己嘅廣告，有自己嘅新聞，有一個獨特嘅世界觀。佢好暴力，暴力到以我當時仲係細路仔嘅年紀嚟講，係一套唔應該睇嘅戲。」

因為時間嘅問題，我問唔清楚點解Juno覺得《鐵甲威龍》（1987）係一套Cult片，但係我深信佢講得出，一定有佢嘅道理，所以之後我翻睇多次呢套戲。《鐵甲威龍》呢套戲主要係講一個叫Murphy（Peter Weller飾）嘅警察與劫匪槍戰後傷重不治，一個高科技公司就拎咗佢殘缺不堪嘅屍首改造成RoboCop，一個為打擊罪惡嘅存在嘅Cyborg。雖然經歷洗腦程序，但Murphy仍有些少殘餘記憶，更憑此線索找出劫匪。劫匪首領遭逮捕時就指幕後主腦是高科技公司總經理Dick，但Murphy因程式設定無法對抗公司主管，所以束手無策。最後，公司大老闆在得悉Dick真面目後下令開除Dick，令Murphy可以親手殺死這個大奸角。

學者Ernest Mathijs同Xavier Mendik喺《The Cult Film Reader》（2008）一書中，為Cult片下定義，指Cult片有8個特徵，包括：爛、創新、挑戰Genre、離經叛道、開放式結局、血腥、懷舊以及呼應其他文本。當然，兩位學者唔係話有齊8個特徵先稱得上Cult片，佢哋係講緊一套Cult片多數有一個或以上嘅上述特徵。如果睇以上特徵，《鐵甲威龍》的確係至少中咗一樣，血腥。戲中的確有唔少血腥場面，包括高科技公司員工被失控的執法機械人亂槍射死、Murphy被劫匪射斷手手腳腳。不過，得一個特徵中咗就認定《鐵甲威龍》係Cult片又似乎好似爭啲咁，有少少草率，即係史提芬史匹堡嘅《大白鯊》都好血腥，但話佢係Cult片又唔係幾稱得上。

咁會唔會有一個比較決定性嘅理據，可以話《鐵甲威龍》係Cult片？其實Cult片呢樣嘢，從來都唔係一個電影種類，用標籤嚟講應該更加貼切。而呢種標籤唔係一個人就做到嘅事，而係好多人參與嘅事。一套Cult片，除咗電影內容本身令到佢成為Cult片，仲要靠一班Fans、信徒去成就。《鐵甲威龍》有一大班追隨者，而呢班追隨者就構成咗一種文化，唔同層面、情況下會睇到呢種文化嘅影子，就好似外國嘅Cosplay活動中，唔難搵到Cosplayer扮演RoboCop咁。而《鐵甲威龍》更加係影響到一代人，翻拍2014版《鐵甲威龍》嘅導演José Padilha就曾經係訪問度講過，自己唔想拍其他戲，淨係想翻拍《鐵甲威龍》，更當面要求擁有版權嘅Sony畀佢翻拍，可見佢深受呢套戲嘅影響。新版本嘅《鐵甲威龍》就正正係呼應緊1987版《鐵甲威龍》，比起呼應一套戲，被一套戲呼應更見其文化影響力，所以《鐵甲威龍》的的確確係套Cult片。