【翠絲】袁富華得獎成金馬最高收視　返港獲鄧萃雯贈驚喜感動落淚

今屆台灣金馬獎中，香港代表袁富華（Ben）憑電影《翠絲》獲頒最佳男配角，更成為整個頒獎禮中最高收視環節。根據轉播單位台視統計，當晚每分鐘收視最高點，落喺袁富華獲獎並以粵語致詞，收視率達5.20，超過350萬人收看。興奮過後袁富華已經返港繼續工作，同鄧萃雯、林德信拍攝新戲，劇組趁機為佢慶祝，令Ben哥忍唔住喜極而泣。

袁富華（Ben）返港後立即為ViuTv新劇《婚內情》趕工，夥拍鄧萃雯、林德信大鬥演技。攝影師更「加餸」慶祝Ben哥得獎，袁富華笑指已收拾心情，為新工作做準備：「一返到香港就要排舞台劇，之後咪嚟呢度開工，工作都未停過，不過係開心嘅。雖然第一次同雯女合作，不過大家都有講有笑，已經唔記得當中的疲累。」袁富華就話未諗加片酬，隨緣圓滿「主角夢」：「緣份到自然有啦，其實之前都拍了部電影做主角，不過未上映，一切都係等緣份到，我本身好鍾意做戲，所以有冇獎都唔緊要，最緊要有戲俾我做。」

拍攝途中雯女突然送上蛋糕慶祝袁富華得獎，大讚對方為港爭光，Ben哥忍不住喜極而泣：「咁鬼馬！唔怪之得未cut機就入嚟啦！搞到我喊晒又要補妝！」鄧萃雯更大讚對方專業，放心跟對方鬥戲：「因為佢係舞台劇演員，佢哋有個習慣就係會做足功課，嚟到現場見佢準備十足，所以我放心同佢夾唔同火花出嚟。」

新劇與鄧萃雯、林德信首度合作，袁富華大讚有火花：「第一次同雯女合作，因為大家好肯傾，因為我舞台劇出身，好著重排練搵火花，搵最好的演出方法。（拍完有冇得放假？）冇啊，因為我哋做舞台劇，拍完就要埋位閉關排戲，所以一直做落去。」