【心理罪之城市之光】鄧超瘋狂大爆發　同阮經天鬥癲咬斷對方手指

今個星期四（4/1）上映的《心理罪之城市之光》，以天才刑警與冷血殺人犯鬥智鬥力為題材，主角鄧超就是飾演刑警方木，要調查連環變態殺手阮經天，當中有多場心理戰及打鬥戲。不過鬥智鬥力都未夠，戲中壓軸一場仲要鬥變態，打交打到咬斷對方手指。

演變態連環殺人狂的阮經天，在《心理罪之城市之光》中日間是個好好先生，但入夜便殺人因子作祟，變得兇殘，所以演繹時，要經常保持眼神凌厲，行徑古怪般。目標就是將每單兇殺過程當作表演。身為一代男神，亦是影帝，能放低靚仔樣，以一臉血汗加長髮造型示人，其角色的搶戲度十足。

對手強橫，幸好演警察的鄧超亦不甘示弱，先來個全白髮Look，似要增添智慧感覺。而為了故事發展，他更主動提出要真食避孕套，讓全劇組大為驚訝！「大家一定會覺得角色癲了，但這真是他在絕路下的最後一著。戲中我還要咬斷阮經天的手指，其實我的角色為了破案，也可以和犯人一樣變態。」避孕套會同隻斷指有關？到底發生咩事，好亂！

據鄧超所講，戲中跟阮經天無論文戲還是動作戲，每天在片場都拼盡100%狠勁，甚至有真打之嫌。鄧超︰「咬斷他手指前我們拍了一番打鬥，大家真是出盡力互相推撞，就算咬那隻假手，也真的肉緊得咬到牙痛。」不過戲中阮經天都不客氣，一幕拎起士巴拿想打死鄧超，但鄧超又使勁揑實阮經天條頸，又撞佢個頭埋牆，結果喊cut後，大家發現周都身傷晒，兩位真係夠晒投入。