【專業演員】影帝拍戲求真吞安全套 被五花大綁過肩摔
撰文：洪曉璇
出版：更新：
根據周星馳都推薦嘅一本書，史坦尼斯夫斯基所寫嘅《演員的自我修養》中提到，演技係應該由外到內再由內去返外。全程投入角色，盡量唔用替身已經係基本嘢，要克服心理障礙做啲超乎常人嘅舉動先至困難。影帝級人馬鄧超為咗新戲而受盡苦頭，宣傳時被五花大綁，被女公安過肩摔，拍攝時更吞咗個真嘅安全套，而工作人員只係關心：「好不好吃？」令佢笑言好受傷呀。
鄧超於新戲《心理罪之城市之光》中飾演天才神探方木，要追捕阮經天飾演嘅變態殺人犯，其中一幕佢為咗保護證物，將安全套放入口直接吞落肚。本來劇組準備咗一啲用糖醬製成嘅道具安全套，點知鄧超去到現場一見到，就話唔夠逼真，主動提出食真嘅安全套。一roll機鄧超毫不猶豫就丟入口中，而且為咗拍攝不同角度畫面，連續食咗好幾個安全套都毫無怨言。不過拍完之後鄧超不禁投訴話：「大家都問我好不好吃，都不是關心我難不難受。但我覺得這事方木真能做得出來，所以就演了。」
除咗拍攝時為求逼真堅吞安全套，出席各個宣傳活動鄧超都非常賣力，除咗喺首映時被阮經天等人五花大綁之外，鄧超同導演去到沈陽市中國刑事警察學院舉行試映會時，同一位受過特警訓練嘅學生對打，被呢位女警過肩摔，真係睇到都覺得痛，難怪鄧超事後即刻到微博留言話：「本人宣布，今天起不參加《心理罪之城市之光》的任何宣傳活動。」
+2