姜皓文愈拍愈旺 趁結婚18周年買檳城樓贈太太︰之前送錶送家品咋
近年成為影壇奇葩的姜皓文（黑仔），套套電影不是有他客串就是配角，拍攝中的《電影痴漢》更加會首次擔正做男主角。不過每年再忙，到10月尾都定必會停工，因為這個時候都是兩公婆生日及結婚紀念日大日子，例必慶祝一番。
今年是黑仔與太太殷寧（原名金慧英）結婚18年，所以早先決定開個大型Party慶祝下，並邀請了林建明、張啟樂、寶珮如、羅天池、Kawaii等數十名好朋友，浩浩蕩蕩一齊去馬來西亞檳城度假。
自己生日、太太生日、結婚紀念日狂玩3日
其實黑仔太太向來都鍾意去旅行，平日一有空檔兩位都會出埠，但好似這次一行數十位老友一齊飛就比較難得。由於黑仔的生日、太太生日與結婚周年紀念日就是連續3天的，所以向來都會連續3日大肆慶祝︰「呢班朋友最少識了10年，有些人更識了30年，全部都是在演藝生涯上最支持我的好朋友。有甚麼喜慶事大家都會一起慶祝，但這樣大型連續幾日這麼多活動，還是3、5年才搞一次 。」今年是姜氏夫婦結婚18周年大日子，成班朋友的慶祝活動由機場開始，大家排了一隻舞表演俾兩公婆睇。黑仔說︰「見到班平日連運動都少的老友，竟然為自己事先秘密排練舞步作禮物，實在非常感動。」
老友炮製生日歌有洋蔥
去到檳城，派對正式開始，今年主題係「反串」，姜太殷寧笑說辛苦了一眾男生精心扮女人，「大家帶齊cosplay衣服過去，又貼假睫毛又塗指甲油，我扮日本武士就好easy。」黑仔指自己扮日本藝伎，「但個假髮是美少女戰士，哈哈……」大姐Ming林建明戴黑超著西裝扮昆頓塔倫天奴電影中的黑幫，又有人以阿拉丁、裝修師傅、旗袍look等上陣，大家玩得興起時甚至互咀。
整個旅程高潮就是一眾老友趁黑仔在餐廳切蛋糕時，齊聲唱出由同行的張啟樂作曲填詞，黑仔專屬的生日歌《萬壽友姜》。歌詞提到祝黑仔做影帝、拍更多好戲，更指跟姜皓文做朋友是福氣，結果搞到向來有淚不輕彈的黑仔都當場落淚。「我同朋友講自己不會喊，點知最後還是感動到眼濕濕。」
7位數檳城豪宅贈太太
至於點解生日派對要揀在檳城搞，原來對上一次同太太第一次去檳城玩，兩個都好鍾意這個地方，仲同太太一齊睇到個心水單位，於是好快就落實買嚟送俾太太。「當度假好，當將來退休用都好，最緊要兩個都鍾意。」豪花7位數，可見近年黑仔真係幾搵到。「其實年年都會買一份大家都喜歡的禮物大家用，之前試過有錶有家品，而樓就係第一次。」問到結婚18年，夫妻相處之道時，姜氏夫婦竟異口同聲話係嗌交，姜太仲大爆平時成日鬧黑仔︰「相處這麼長時間，不嗌下交會好悶的！」鬧完老公都仲有樓收，黑仔真係一個愛妻號。