姜皓文同時拍兩部電影挑戰情緒兩極 　「太太驚我精神分裂」

姜皓文 (黑仔) 近期忙於為他首次擔任男一主演的電影《電影痴漢》進行拍攝工作，這夜他出席戲院重開的活動時，就透露電影拍攝得好順利：「我哋開咗個靚頭，一嚟就拍咗個ending先，第一日已經拍咗套電影最高潮的戲份，我本身好怕拍戲一嚟就拍這些高潮戲，因為未曾有心理準備，又未熱身，同戲中的演員又未熟，加上我個角色的情緒和心情經常徘徊在谷底，自己都驚控制唔到，點知拍攝過程好順利。其實導演真是好好，會同演員一齊去演，我喊導演又陪我喊，令大家都好投入。現在我哋已經拍完那些沈重戲份同複雜戲份，進度理想。」

黑仔表示拍這部戲的同時他亦在拍攝另一部賀歲喜劇，他要在一個情緒極低落的角色與一個很開心的角色之間不停轉換，有一定難度：「其中一場戲我要爆喊，但我啱啱拍完賀歲片，情緒又要由高轉低，我之前將一張我當時醞釀緊情緒的照片放到社交網，嚇得朋友紛紛擔心我問我咩事。這段期間我情緒太波動，老婆都擔心我會唔會精神分裂。（會否將工作的情緒帶回家？）周不時都會帶情緒返屋企，我會沖涼來減壓，老婆是個開心的人，會經常做些開心事來消除我的負面情緒，平日我在家都好開心的。」至於首次擔任電影男一可會特別大壓力，黑仔說：「責任幾大，要兼顧好多嘢。（之後會否加片酬？）呢啲唔諗喇，我先第一部電影做男一。（對部戲有無信心？）我自己無睇過啲片，但聽導演睇過話ok，仲恭喜我，我好期待。」