【愛情奴隸獸】袁文傑捱27年「首次」拍片　葉念琛︰想佢攞新人獎

一套《不懂撒嬌的女人》，袁文傑一個游生角色，令他入行27年，45歲中年才一嘗人氣急升的感受，坊問少女中女個個都變成大叔控，人人愛游生。
向來對潮流敏感的導演葉念琛，也嗅到游生的吸引力，於是找他演出新作《愛情奴隸獸》，演江湖大佬瀟灑哥一角。唔講唔知，唔計在《家有囍事》演見唔到樣的家明之外，今次就係袁文傑第一次作大銀幕演出，連葉念琛都係事後先知︰「原來我集埋游生的第一次，有機會都想提名佢候選最佳新演員。」

翻查維基百科，袁文傑入行27年，很快就拍到港產經典《家有囍事》，不過呢次演出角色家明，就只有背脊出鏡，兼只有聲演，根本唔覺佢有演出。去到2011年，有機會拍下福音電影《唔憂嫁》，不過未有上畫，另一部《香港踢入世界盃》更加只是短片，所以今次《愛情奴隸獸》是袁文傑第一部真真正正，有名有姓有樣見的電影作品。袁文傑在接受《香港01》電話訪問時，也難掩興奮心情︰「我等這個機會真係等了很久，作為演員當然想作多方面嘗試，相信導演都是因為看到我在《不懂撒嬌的女人》的演出，便想起我。」

葉念琛︰我最初用Facebook聯絡佢

隨後我們訪問導演葉念琛，原來他一直都有看袁文傑的演出，「我是標準電視迷，向來連亞視劇集都不放過，他演的《雪花神劍》我都有看呀！」至於點解會想起找袁文傑，的確係關游生事。「因為戲中需要一個好有霸氣的角色，當時大家見到CEO游生的演出都好鍾意，亦跟這個角色匹配，所以我就主動聯絡他。」今時今日要搵一個人，唔使靠電話號碼，用Facebook inbox佢一樣得！「我就係用呢個方法聯絡，好快佢就覆我OK！」

講番今次角色，是要演一名黑幫大佬瀟灑哥，雖然這是一部愛情喜劇，但袁文傑在戲中是要認真交戲。袁文傑說︰「我主要對手有方力申、蘇麗珊同邵音音，我知這是一部喜劇，但導演叫我認真去演就可以，不過同音音姐有場戲就好爆笑，明明好認真去演但就好好笑，好有火花，大家入場要留意。」葉念琛說︰「我就是想要這種反差，只要他愈認真去演，出來效果就愈好笑。」

要不斷加戲俾游生

對於今次合作，導演都有讚冇彈，「大家以為他是客串，其實他是主演，拍攝期間我不停加戲俾佢，所以合作完今次已經想同佢再合作，不過佢都好忙，要大家夾下期。」對於無意中集到袁文傑的大銀幕的「第一次」，葉念琛都覺得好有趣。「我向來喜歡跟新演員合作，想不到今次同袁文傑合作都會有第一次，我會提名佢候選最佳新演員，希望佢會拎到！」其實唔係講笑，根據金像獎的基制，要候選新演員，只要當事人在參選年度前未曾以主角或配角身份參與任何電影演出，便有資格申請，事實上，袁文傑也透露曾經有好幾部戲都有找他，看來游生拎最佳新演員一獎不是夢啊！