喺ATV浪費15年時間？ 袁文傑念舊：亞視薪水高好多
袁文傑演游生都過咗一段時間，但佢嘅人氣依然不減，甚至認為袁文傑喺亞視服務咗15年係浪費青春，亦唔明白點解藝訓班出身嘅佢當年唔受重用；其實委屈有時自己至知，今日袁文傑接受商台《一圈圈》梁泰來訪問時，就爆喺訓練班表現好又兩個月接咗50幾個騷TVB都唔要佢，迫於無奈至過檔亞視。
游生袁文傑入行27年，1990年參加第4期藝員訓練班，喺22名學員中只得6名被TVB選中簽約成為藝員，冇袁文傑份，梁泰來就問佢知唔知原因？袁文傑有啲無奈：「問過藝員部嗰兩個月實習期間表現都唔差吖！兩個月做咗50幾個騷，訓練班嚟講我最多，點解唔簽嘅？公司話可能經驗仲未夠啦！未成熟啦，不過唔緊要嘅，你改住特約演員先啦，維持番呢個興趣，第時返嚟玩下囉！第時啲嘢第時先算囉！」袁文傑感慨講：「會有啲失望，自問兩個月盡晒力，每個月得幾千蚊津貼。唔緊要，嗰陣仲係好後生啫！呢鋪唔中仲會有時間嘛，如果冇考過訓練班我就冇呢個經驗，亦都唔會入咗呢行，雖然我嘅路途比較轉折啲。」
之後袁文傑唯有以特約演員身份做啲茄喱啡角色，亦有客串電影，《家有囍事》一直見唔到樣嘅家明就係佢。期間亦做過其他工作，例如喺大型唱片連鎖店做售貨員，亦做過模特兒以及簽約娛樂唱片公司，可惜唱片業低迷，經理人勸佢入亞視。
就係咁，袁文傑喺亞視做咗15年，唔紅又唔黒，記得佢個樣又唔記得佢做過乜，梁泰來指有人認為佢喺亞視15年係浪費青春，袁文傑就唔認同：「我好反感啲人用浪費字眼去形容，特別對於我嚟講，喺呢個台我多謝製作人，不斷有得做又叫有個位置，幾穩定嘅收入。」佢仲好懷念亞視：「其實亞視份人工幾好呀！比而家(TVB)高好多！啲人以為亞視冇收入薪水冇咁高，其實薪水係高好多㗎！」TVB識做啦！
但佢慨嘆亞視毀喺王征手上：「我唔敢講（王征累死亞視），不過同佢梗係有關！佢都幾掂㗎真係，佢玩到咁樣樣，但佢開心之餘又帶唔到實質嘅嘢！其實王征年代有《星光大道》一班年青人出咗嚟，令以往穩重或者老氣嗰種形象完全改變晒！你只要掌握到呢班新血，再加埋有經驗嗰班藝人，所產生嘅作用你係估唔到嘅！點會倒退到收檔嘅地步？你話係咪可惜吖？」
袁文傑始終醉心演藝事業，上年返TVB接拍第一套劇《不懂撒嬌的女人》即人氣急升，但佢話唔覺得自己紅，只係想繼續得到觀眾認同，希望TVB唔好再浪費咁好嘅人材啦！