【溫多娜手記】新地第三代堂兄弟首合作跑接力　細佬基泓話有壓力

是日一大早，郭氏家族第三代、新地（0016）執行董事郭基煇（Adam）和郭基泓（Christopher）兩堂兄弟再度落場參加「新地公益垂直跑—勇闖ICC」親身撐慈善。今次更係兩堂兄弟首度合作跑接力賽，由堂細佬Christopher跑第一棒，而堂哥Adam就跑最後一棒，負責衝線。

堂兄弟首度合作，成績仲唔錯添，喺企業組隊際接力賽取得第六名，時間係15分19秒，好過之前兩人分開跑個人賽嘅成績。

有咁嘅成績，托賴隊友之外，兩堂兄弟喺比賽之前兩個月已經練習，Christopher話兩人平時喺新地總部後樓梯放工後練習1小時，大大話話都要跑上53層！Christopher賽後分享心得話：「一頭一尾，交棒一定要交得靚仔」，Adam則補充「最緊要唔好仆親」。

對兩堂兄弟合作跑接力，Adam就笑笑口講：「有啲新意，兩個人一齊跑幾好玩，好過自己一個跑」，Christopher則認有壓力，「大家共同目標，如果自己做得唔好會拖累埋其他人，多咗motivation」，同埋「精神上有壓力，所以會努力多啲」。

今次活動參加人數達1,900多人，Adam就話有信心出年可達2,000人參加，而今次所籌善款達600萬元，當中三分之二都係集團額外捐款。