【溫多娜手記】田北辰「公廁論」嘲政府唔創新　撑中小企不忘抽水

立法會議員田北辰向來有「建制派壞孩子」之稱，今日他出席一個中小企活動時，藉着自己一身西裝造型，大談企業創新之道，又再展「壞孩子」作風，以「公廁論」諷刺港府缺乏創新思維，連同場的商務及經濟發展局副局長陳百里也「無面畀」！

着G2000新品型格亮相

有中小企商會今日舉行以創新為主題的頒獎禮，作為時裝品牌G2000創辦人兼主席，田北辰以一身灰色孖襟格仔西裝亮相。他致辭時，就為其型格造型解畫，原來他身穿的正是G2000的最新出品，「之前同班後生仔開會，我死都話唔應該出呢啲嘢，邊有人仲著孖襟？仲要大格仔？點知呢件嘢依家係全間舖最好賣。」但他揚言，今年好賣不代表明年也好賣，寄語中小企老闆要拋卻舊有的成功方程式，不斷創新才能「叫得起價」。

籲政府改變採購政策扶助初創

談及香港創科發展，田老闆愈講愈起勁，他提到自己作為「雙料議員」及公廁常客，相當關注公廁的衛生問題，但大部分公廁的洗手盤、洗手液及乾手機均設於不同位置，令廁所地板長期潮濕，非常危險。田二少就指，其實外國早已採用新設計，將洗手間設施「一站式」整合，而香港政府亦應該早日引入，「你好難相信，就連公廁咁簡單，我哋都唔可以創新！」

田二少又指，港府要扶持創科發展，最關鍵的是向初創提供市場，而政府採購正是重要一環。他舉例指，現時政府為電子服務外判招標時，側重價錢多於創意，「你咁樣永遠都唔會有新意，所以我一路都主張3成睇價錢、7成睇創意。」他批評，就算政府因而「使貴咗」亦微不足道，「你成個政府每年幾千億經常性開支，電子服務外判招標要幾錢啫？好濕碎咋嘛！」

田北辰近年雖然大半隻腳踩入政界，但作為「一代褲王」田元灝么子，又曾經離開家族企業自立門戶，田二少似乎仍然對中小企相當有感情，據稱已是連續第2年出席活動。