【港產片萬歲】「港式映画」Q版胸像 烏蠅方丈強雄大亂鬥
每次翻睇星爺或王家衛的作品時，都會特別感激老豆老母是香港人，因為只有我們香港人，才能完全理解港產片對白的精妙浪漫，或是抵死啜核。
在無限翻睇和鬥背對白以外，今夏大家還有多一個回味港產片的方法。港產玩具製作商LIGO DESIGN和港產插畫師Tik Ka From East（迪嘉）合作，準備推出「港產映画」（HONG KONG HOLLYWOOD）立體胸像玩具系列，第一彈包括烏蠅哥、李先生、強雄和夢遺大師－－大佬呀，唔使我寫出自邊套電影喇啩？
刻骨銘心初戀金銀情侶套餐賣99個9毫9，而每款「港產映画」胸像只售88蚊，比起一眾貴價歐美胸像來得親民。但正所謂越簡單嘅嘢越難整，要完美重現烏蠅哥aka張學友說出「吔屎吖你」時面容扭曲，或是強雄aka謝賢說「全部都係我嘅人，點同我打呀」時那種由內到外再到翻內的自信？唔係咁易嘅。但就官方圖片所見，Q版化後仍然形神俱備，再加上大家揸緊信念，自行「腦補」這幾4位出色男人的神髓，個觀感就會fit曬。
烏蠅（張學友飾）／旺角卡門（王家衛導，1988年）
「着西裝打呔，攞大哥電話有咩用呀？吓！跟啲咁嘅大佬，吔屎丫你！」
「我烏蠅寧願做一日英雄，都唔想做一世烏蠅呀﹗」
「無翅你食呀？無鮑魚你食呀？係無冷氣咋嘛﹗咁多嘢講做咩呀﹗照我話事，你係食齋鮑魚㗎咋﹗」
「食鮑魚﹗食屎啦你﹗」
李先生（李小龍）／《龍爭虎鬥》（Robert Clouse導，1973）
“ Don't think. FEEEEEEEEL! It's like a finger pointing away to the moon.
Do not concentrate on the finger or you will miss all of the heavenly glory!
Never take your eyes off your opponent... even when you're bowing!”
強雄（謝賢）／《少林足球》（周星馳導，2001）
「重有球證、旁證，足協，足總，足委，全部都係我嘅人，點同我鬥呀？」
「我係打人呀，你吹呀？我就係要打到你隊人好似你個跛佬一樣，殘廢﹗殘廢﹗殘廢﹗」
「跳舞都唔輪到你跳啦，係我跳！」
「咩話？40比零？」
夢遺大師（劉以達）／《食神》（周星馳，李力持導，1996）
「少林寺方丈，法號夢遺。阿彌……陀佛，我隨風而來，隨風而去，喂！我係史提芬周老友喎！俾下面得啩！喂！唔該吖，唔該吖。」
「咪郁，你呢就俾D有毒嘅攀藤植物拮親，而家就好在未落到去百會穴啫，唔係呢你就死梗㗎喇。我呢已經同你啜D毒啜得七七八八啦。而家就淨番呢度啫，就俾我啜埋先呀唔該。」
「我最憎人係我背後講我壞話。」
Tik Ka from East（迪嘉）Profile…
擅長以Q版國畫風格呈現西方影視角色，2015年的《中式沙鍋》把一眾星戰人物化為國畫中人，其後亦把《龍珠》、《復仇者聯盟》以至麥當勞叔叔等流行文化icon盡數「中西合壁」。
【港產映画】第一彈
全4款，每款約高4吋
網上預訂：LIGO DESIGN
零售販賣：待定
一套4款預訂價：HK$352
單款（隨機抽選）: HK$88
發貨日期：2017年10月