【職場新鮮人】學歷只係入場券　晚晚OT唔代表你有「利用價值」…

SJ相信好多人都經歷過呢個階段：讀大學時，即使係一、兩次考試分數稍為高一點，或者成功當選某學會管理層／球隊隊長之類角色，甚至偶爾有機會與某某名人單獨見面傾談社會大事，已經以為自己好把閉，好似站在世界之巔。
18歲，就是氣燄更盛，自信爆棚。

幾年轉眼過去，踏入職場後，無論你係高材生定係莊主，自然感受到社會的震撼教育：話之你咩大學畢業，其實你什麼都不是。曾經的大學生光環（尤其讀名牌大學或神科之類），在社會五光十色的招牌與資本力量下，早已變得黯淡無光。

出來社會做嘢，只係睇你一樣嘢：你創造幾多價值？

「創造幾多價值」，有啲人話叫 Value-adding，其實更直接的，可以用以下呢句金句理解：

唔好怕被人利用。能夠被人利用，代表你依然有利用價值。最怕有一日，你連被利用價值都冇，那才是真正可悲。

無論你身處任何行業，公司出得1萬定10萬糧俾你，原因只有一個，就係你可以幫公司帶來最少2至3倍以上價值。而公司可以出呢份糧俾你，亦係因為公司的客戶交出訂單，因為公司可以提供到訂單貨品／服務價錢的價值，而呢個價值及價錢，係完全擊敗市場上其他對手的。

關於Value-adding呢回事，有一個故事可以同大家分享：

香港有好多開鎖匠，一般來說開個鎖盛惠約800大元。一個新仔開鎖匠，開一次鎖可能要花費成個鐘，身水身汗，收費800，而一個老師傅不消5分鐘，已經輕鬆開鎖，同樣收費800。

由此可見，  喺一個商業社會，「價格」呢回事並不取決於你花幾多時間精力去做嘢，而在於你的End product係咩嘢，值幾多錢。打工其實一樣，當然呢個係Ideally speaking，一間好公司Remunerate員工，主要看重員工表現，而各種職效評估KPI就係希望量化員工表現。相反，員工是否經常OT，並不應該視為主要考慮。

人生想要事業成功，對絕大部分人而言，一世人其實只係要解決兩大問題：

1. 尋找一個突破點，搵到個人的Niche，個人可以創造價值的地方

正如以上例子，一個熟手的開鎖匠，熟悉香港所有常用門鎖，熟悉所有常見的木門與鐵閘的構造，成為呢方面獨當一面的專家。絕大部分人，其實只需找到如此一個技能或事業突破點，例如你做Compliance的話，你做到成間銀行你最熟所有本地與國際AML法規，以及銀行AML政策與應用，咁你已經可以獨當一面。相反，如果你甘於在Compliance部門裏面做一個冗員，射波射得就射，最好乜都唔使你做，咁你一世就係咁大，裁員潮第一個就裁你。

2. 將自己的個人價值 Scale up 散播出去，發大來做

假如你係一個出色的開鎖匠，每次賺800，減去成本一個月可能可以賺5至6萬，但呢個已經係你個人產能的極限。做一個出色的牙醫，日日洗牙補牙，時間精力做到最盡，可能一個月10至20萬Maxed out。但當你有一範可以話獨當一面時，呢個時候你可以考慮將自己個人價值Scale up，將個人價值散播出去。當然，呢個係知易行難，分分鐘仲難過上面第一步。要Scale up個人價值，視乎行業有各種方法。

例如，一個出色的開鎖匠，可以訓練更多徒弟，由自己一個人開鎖，變成一個20人的開鎖集團，假設每個徒弟人工2萬，再另外幫你賺2萬，咁你作為集團老闆就月入40萬。

但呢度有一些好大假設，假如呢啲假設唔Work的話，隨時血本無歸：首先，你有冇咁多生意？如果呢個月有，你又係咪肯定下個月都係？ 其次，你的徒弟係咪做到嘢？如果佢地好出色，咁你點樣留得住佢地？如果做唔到嘢，又等於幫你倒米。 由此可見，如果一盤生意，靠「人」賺錢，即所謂輕資本，好似地產代理之類生意，好考管人技巧，易學難精。

行另一條路，呢位開鎖匠可以考慮自行研發一種門鎖，可能係密碼定指模，或者研發一種會提你帶鎖匙出街的警報工具，然後大量生產，再每年收系統升級保養費用等，呢個就係行一條產品路線。好處係所謂「Scalable」，好似微軟開發Office 360一樣。產品一經開發後，賣一件同賣一萬件，在營業額增加一萬倍時，成本只會輕微上升。而壞處係，前期研發成本大，時間長，而且產品推出後成功機會難料，如果唔work就浪費了大量時間金錢。

無論如何，你係讀緊大學又好，剛畢業都好，最好盡快了解呢個商業社會基本上係咁樣運作的，而非單純地睇你學歷定付出。當然，呢兩樣嘢一樣好重要，更多係「入場券」呢個問題。

如果問有D咩係「What I wish I knew earlier」，我相信呢個Add value道理與經驗，會係最優先次序之一。

希望大家從中都有啟發。

SJ結語

如果你睇緊呢個Page，單純以年齡分佈估計，相信你好可能仍然在第一點，即係尋找自己的Niche，在發展自己一個獨當一面的技能。

祝願大家努力搵到自己的天賦及興趣所在，並且誠邀大家分享經歷，無論你係未開始，剛開始，苦戰中，抑或已經成功，SJ都非常歡迎大家分享經歷，可以Inspire到更多人。

【原文轉載自StealJobs.com。StealJobs全面透露各行各業人工，工時，晉升前景，以及入行攻略，歡迎匿名提供收入資料。】