【係窮呀】窮人3大特質：一懶、二貪、三大使 想財務穩健先要…
2018年的香港人，財政上可謂冰火兩極：有一批人受惠於一些大趨勢而豬籠入水，30出頭月入6位數字，例如投行Front Office（全球一體化）；做Google或網絡紅人（Web 2.0、3.0、4.0等等機會）；以至部分專Serve大陸土豪的「理財顧問」（aka 保險Agent……）等等。
但另外一大部分的香港人，工作冇受惠於呢啲大趨勢，收入則如逆水行舟，不進則退，更加冇可能追到節節上揚的樓價。當然，每行都有自己的High Flyers，以及平平無奇的大眾，但當你的行業一旦處於巨大機會的「風口」，則連豬都識飛。
SJ改天再談談不同的行業，邊啲係上升中，而邊啲係夕陽行業。但今日講講，就係對於「金錢」的個人的修為。幾日前，SJ同一位前輩談及「窮」呢個問題。究竟咩係窮，以及點先可以唔窮。撇除一些冇得控制的因素，例如健康同行業本身是否難撈，其實人窮基本上離唔開3大原因：一懶、二貪、三大使！
首先，咩叫窮？無論搵3萬同10萬，甚至30萬一個月，係窮定富泰安逸更加取決於支出。阿媽係女人的道理：量入為出，但係往往知易行難。富泰安逸，並唔取決於你開Honda定S500L，而係你做你想做的事，過你想過的生活時，是否需要為「錢」呢個字煩惱。假如你開Honda而且一炮過亦唔需要擔心維修費用及牌費，隨時中意開去邊就開去邊，咁其實你比另外一個人更加富泰而安逸——開S500L，但要供車，保險／年檢／牌費樣樣貴，個個月供車養車都好似割肉咁痛苦。
所以亦去到本文主題：人窮的三大原因——
1、懶惰——甘願人生「戇居居」無所事事
人懶就自不然賺錢更少，呢個道理係人都知。但市面上好多「專家」講話其實懶人先做到大老闆，勤力的人只會做到個好員工。其實呢個係一個偷換概念。成功創業的老闆，往往係懶做一些重複無聊的工序，而瘋狂地投入做真正有Value-adding的業務：無論係CEO親自Pitch一個大客，或斷定公司的戰略部署，或重大人事安排等等。
唔辛苦唔得世間財，而且亦取決於你辛苦做乜，辛苦洗碗同辛苦Pitch一個MNC大客係兩碼子的事。但底線係，無論咩崗位，努力唔保證成功，但懶惰幾乎保證失敗與貧窮。
據說而家一位當紅的江湖中人，當年都出身寒微，就係佐敦做代客泊車的泊車仔。但當其他人掛住吹水吃喝玩樂，呢位仁兄將其分內事「泊車」當作一件認真的事來做，而且對車主往往好好口「唔該前、唔該後」，將「多謝晒老細，慢慢開」掛在嘴邊，終於得到賞識，後來成為一方「大佬」。此所謂以誠得天下矣。
2、貪心——貪念蒙蔽了理性Judgment
SJ相信好多人身邊都最少聽聞過一兩個例子：打工辛辛苦苦做左幾十年，儲落幾十到幾百萬元不等的長輩，終於信錯內幕消息買股票，或同一個識左唔夠三個月的人，投資夾份開茶餐廳，而一Q清袋。
貪心同上進，有時真係一線之隔，而且成王敗寇。2005年，假如你孤注一擲買思捷環球，轉頭你辛辛苦苦儲落的錢就蒸發九成，一百萬變十萬。但假如你孤注一擲買騰訊，咁你就會變做千萬甚至億萬富豪。
當然，任何投資或生意，甚至係個人工作表現，點都有一定「賭博性」。但成功同失敗的分別，更多情況係除咗Dumb Luck以外，係「Take calculated risks and make informed choices」以及「是鬼但人有我有」的決定。
更甚者，賭博浪費金錢以外，更重要係浪費寶貴時間，以及消磨一個人的意志。除非你本身經營賭廳，業務所需要落場玩，否則，沉迷賭博幾乎保證好窮。
3、揮霍： 大使成性，搵幾多都冇用
呢個正正就係以上所講的收入相對支出比例，亦解釋到點解無論月入2萬同月入40萬的人，一樣可以好窮，或一樣可以好安逸。月入2萬的人，假如支出穩定地在1萬左右，咁其實個個月有錢剩，假以時日都會一筆儲蓄，可能都係唔夠買樓，但總算係有個錢傍身。有需要時都唔會「拿手唔成勢」。
另一邊廂，香港就有一位許姓前高官，身為香港第二把交椅，月入高達40萬，本應係社會上的超高收入人士，最終卻一樣落得破產地步，甚至因貪污相關罪行而鋃鐺入獄。本來，月入40萬，對大部份人來講等於「發達」。但對呢位官員，月入40萬，卻過住月入100萬先足夠的生活，揮霍無度，下下坐頭等飛London，出入超五星級酒店及天價餐廳。雖然風光一時，最終一樣變到「好窮」。
係好老土，但唔想窮，或者所謂「財務穩健」，真係要戒大使：名牌、旅行、食好西、開靚車、住豪宅、入馬會，乜都係錢。即使月入40萬，一樣好快就霍晒去。SJ認為，隨着收入增長（hopefully），最重要就係調整自己心態，唔好有種「我今時唔同往日」的心態，覺得自己「值得擁有」，升職加人工就拿拿臨買隻10萬蚊名錶，或買個愛馬仕手袋，或即Join W酒店的Membership，定期去食好西，「反正我而家Afford到」。
首先，你鬼知你一路咁好賺？下年份Bonus係咪都會咁豐厚？ 甚至係，如果你得罪老細，或經濟不景，或公司進行Outsourcing，而導致你冇咗份工，咁你又點算呢？記住，人無千日好，花無百日紅，好天收埋落雨柴。
再者，大部份「物質」，本質上係無任何意義。唔係話月入10萬都要過清貧生活，但買隻名錶又點呢？定期去Fine dining，冇$1000 per head唔食，但轉頭咪又係變左一篤屎。
更加重要的，係無論你搵幾多錢，要時刻記住 「You are just a piece of shit. 」 你再有錢，有錢不過李嘉誠；你再偉大，偉大不過德蘭修女。在複雜而浩瀚的社會裏面，你再風光巴閉，都好可能係短暫的，而且即使風光一刻，其實格局一樣細得可憐，冇咩嘢值得Show off。因此，記住時刻保持謙虛，而呢種心態亦會延伸到物質的追求。
廣告成日話「你值得擁有」 然後水你買Markup超過100倍的名牌，但你係咪真係「值得擁有」？其實你依然係好渺小。
月入2萬，用1至1.5 萬，係生活所需，無可厚非；月入5萬，用1.5至3萬，都可以話係合理水平。月入10萬，假如依然可以維持係使1.5至3 萬，咁你就真係幾Financially comfortable，過你的生活都唔使點為錢愁。當然啦，呢到係假設家庭生活要求不變。
最怕係月入2萬時使1至1.5 萬，到月入10萬就使9.5萬，咁就好易好易出事。呢種剩5千同月入2萬的剩5千，係完全不同的概念。咁「大使」的話，簡直係引火自焚。
SJ結語
男人女人都唔可以窮！從今日開始，重新掌握自己人生財務命運吧！
【原文轉載自StealJobs.com。StealJobs全面透露各行各業人工，工時，晉升前景，以及入行攻略，歡迎匿名提供收入資料。】
【職場熱話】自製$20午餐 每月慳$1,500？網民：窮仲講乜營養…
近日有網民在討論區分享如何設計最經濟同時有足夠營養的午餐，引起不少網民回應。有人表示一日只吃兩餐；又有人認為要平就難顧及營養，寧願食「M記24蚊餐搞掂」；有人則表示以豆取代肉就便宜又健康。
【自我管理】自律其實唔難 堅持落去先難！ 3個小方法抵抗惰性
立即下載《香港01》，緊貼公務員職位空缺、勞工處筍工推介，了解CV、面試致勝技巧！
下載網址：
https://hk01.app.link/bkbJyY5t4O