【你睇佢好】擁有愈多選擇愈少 ？　「人生贏家」其實先係Loser…

從小到大，絕大部分盡責的父母同老師，都會幫我地安排最好的教育，而且學各種技能、運動同外語，務求係令我地將來有 「多個選擇」。聽起來的確好正，不是嗎？

例如，當你DSE成功取得好多個星星，你有大量選擇：

你可以讀大學，可以讀包括三大HKU CUHK UST的任何一間本地大學，亦可以去外國讀大學，可以選讀各神科，從Medic到Law，Global Business到藥劑，悉隨尊便。

假如你對做專業人士或者Finance無乜興趣，反而想創立自己的服裝品牌，或者甚至只想學會人手製衣的Craftsmanship，理論上，你亦可以讀IVE或者High Dip的紡織課程 ，或者Poly裡面的紡織及製衣學系，雖然後者已經略嫌太多理論。

然而，睇到呢度，心水清的SJ讀者，已經內心咒罵：DSE狀元去讀IVE，痴線咩，唔讀港大BBA Law就笨啦。

SJ曾經同一位高考狀元朋友傾過偈，佢亦表示其實當你A Level有4A時，你根本無乜選擇，而你的人生亦跟隨一條既定的路軌行走：專業人士，結婚生兒育女，走上一條中產康莊大道。

對絕大部分人而言，得到愈多選擇，其實只有更少選擇。 尤其係叻人之中，呢個問題更加嚴重。

叻人的問題，往往係過度分析（Over-analysed）同解讀所有事，尤其係影響人生的決定，往往更容易陷入思考癱瘓，以至未能及時作出決定。

其中一個重大原因，就係上述Barry Schwartz講到的人類思考盲點，包括左一種貪得無厭的心態。

引述一個真人實驗，佢得出結論係假如你面前只有一碟果醬被你享用，你的滿足程度反而遠比你面前有好多碟果醬任你選擇而高。

當然，假如完全無果醬，就更加冇滿足感可言。

人得到一點點物質，反而更懂得感恩。 面臨只得一個機會，更懂得珍惜同知道一定要把握好。

正如SJ一位非常成功的商人前輩朋友，亦曾經私底下指出當你有3000-8000萬左右身家，Run一盤中小型生意請10-20個人左右，其實係人生快樂感的Sweet spot，呢個階段你物質充裕，而且又足以引誘你自命為商業大亨，而只專注做一個中小企老闆。 當你身家上億，甚至上埋市，就係一切巨大煩惱的開端，所有人突然對你有巨大期望，一言一行都要好小心。 (不過，當然首先你要有3000萬…….然而，對大部分人而言，呢個數其實可以調整既，無需強求或失落。)

正如你讀完大學，或者工作幾年， 一樣面臨好多選擇：讀唔讀Master，要唔要博業績、考唔考政府工、轉唔轉工、轉唔轉行、創唔創業、搞App定餐廳、去唔去大灣區買樓、定係投資美股、定係移民去台灣或者澳洲？

好多叻人面對眾多選擇， 結果都係每個慢慢分析，然後又訂立初步決定，然後再三思量都係再考慮，然後再推翻初步決定，Back to square one再從新考慮，睇定啲先。

反而，好多人得一股蠻勁，本身天資唔算最優異，腦袋運算能力只容下同時思考一件事，就自然而言專注下來了。

凡事只要專注，點都做到一點成績，幾多成績固然係視乎好多因素，呢度又要返叻人腦袋去運算同操作了。

但假如連一個決定，連一個3年的專注都做唔到，遑論成績幾好，因為根本無成績可言。

是以外國名言：

 A students work for C students, B students work for the government.

最優秀的學生最終為成績最差的學生打工，而平平無奇的學生往往混在政府官僚架構度日。

SJ 結語

其實，做乜都真係無乜所謂，問題係你去唔去落力做，堅持做好一件事，做足365日，做足5年。

呢個就係 執行力！！！！！！

【原文轉載自StealJobs.com。StealJobs全面透露各行各業人工，工時，晉升前景，以及入行攻略，歡迎匿名提供收入資料。】