【職場熱話】一日兩份工　連踩36小時　網民：賺咗唔夠睇醫生…

香港生活成本高昂，打工仔每個月出糧後，扣掉搭車、食飯、電話費、保險費、家用等日常使費後，往往已所淨無幾，莫說買樓，出街食一次貴價餐廳、一年去一次旅行唞唞氣都要諗過度過。為了改善生活，有打工仔一日打兩份工，近日有網民在連登討論區發起討論，詢問有哪些夜間工作推介，不少網民提出建議，亦有網民表示試過早一份工晚一份工的生活，但「賺返黎都係唔夠睇醫生」，相當唏噓。

有網民在連登討論區以「有無人日頭一份正職 夜晚一份兼職」為題，詢問有哪些夜間工作推介，引起不少網民熱烈討論，原來不少人都曾有相似的經驗，除了當酒店炒散、外賣專員、補習、返社區中心、做商場佈置外，亦有不少人在餐廳或酒吧做侍應，例如有網民以前做過一蘭拉麵兼職，「勝在自己可以揀返幾點到幾點，同埋有碗麵食慳返餐。」

另外，又有網民表示夜晚夠精神便會落場揸小巴，有時見爸爸辛苦就替他一更揸的士；亦有網民平時放工便寫書、拍YouTube、搞網店。雖然一日打兩份工可以賺多點，但也要小心身體。有網民的朋友日頭工作朝10晚7，夜晚工作晚11朝5，「仲要成日唔夠人叫佢返，搞到一個月可能先放兩日，又無得補水，只係補假，基本上7日得一晚係有得正常訓，成日好驚佢會暴斃。」

網民就一日返兩份工表達個人意見及建議：（按圖了解）

網民就一日返兩份工表達意見（按圖了解）：

經常捱夜，睡眠不足，容易捱壞身體，有網民表示試過返一份正職，兩份兼職，「唔洗（使）兩個月已經極速消瘦，無人生無休息，賺返黎（嚟）都係唔夠睇醫生。」又有人曾在賽馬會電話投注中心返通宵更，「通常返8pm 至1am，有時8pm至3am，累到個腦一片空白，連情緒都無，最盡果次是連續36個鐘做文員，兼去沙田馬場馬會通頂，連覺都無得訓，真係累到搭地鐵企住都訓得著。」不過，該名網民表示事後覺得不太化算，「當年為每月多幾千，而家年紀大咗睇一次私家專家都四位數字以上。」

除了建議不同工種，有網民建議樓主跳槽或轉行，找一份人工較高的工，總比打兩份工好。又有人建議年輕人放工後去進修，修讀專業技能課程，或學習外語，出路或會更多。

還有其他出路嗎？

年輕人，究竟有什麼動力驅使一日打兩份工呢？係愛吖？定係責任呀？定係因為窮而為錢打拼？相信有很多辛勞的打工仔都是希望改善自己和家人的生活環境，才會不顧健康，拼命搵錢。可是，如果長時間頂硬上，一日工作十幾二十小時，遲早出現健康問題，到最後用錢都未必能換回來。當然，每個人的狀況都不同，大家各有目標，是否值得自己最清楚。

如果是為了賺更多錢，不妨向身邊人了解一下其他工種的行情，看看有沒有機會轉換工作航道，有時候，有勇氣踏出安全區，便可以找到另一片天。如果你心儀的工作需要專業資歷或相關工作經驗，可以嘗試修讀一些短期課程，或是找一些相關的兼職，令自己捱得有價值，即使是要打兩份工，也要懂得衡量哪些經驗可以為自己增值，而不需要一輩子無止境地捱下去。

立即下載《香港01》，緊貼公務員職位空缺、勞工處筍工推介，了解CV、面試致勝技巧！
下載網址：
https://hk01.app.link/bkbJyY5t4O