電車文化館「翻生」重開 館長感激外界：做傻事原來都有人支持
常言道「香港是一個文化沙漠」，今年初唯一的電車文化館因租約問題面臨被逼結業，更令人覺得在港從事文化是件「傻事」。
不過，5月尾山頂廣場的某一角又悄然出現了熟悉的身影，原來電車館已「翻生」重開。館長李俊龍坦言當初已做好電車館完全消失的準備，誰知外界的不捨之情卻比自己更熱切：「大家令我覺得做呢件傻事並唔係我諗咁孤單」。
電車是香港特色，但近年卻有人入紙城規會要求取消，兩年前有一次，日前又有一次。李俊龍（Eric）聽後感嘆道：「真係唔知呢啲人諗咩，如果路面唔塞，搭電車仲快過搭港鐵。」無想到取締的電車方案被否決，盛載歷史的電車文化館卻在年初面臨倒閉。
喜歡所以有責任
2013年成立的電車文化館是全港唯一的電車博物館，售賣電車紀念品之餘，還會展出與電車歷史相關的文物：「因為自細鍾意電車，但唔同巴士同港鐵，電車相關嘅嘢好難搵，所以就諗會唔會可以成立一個方便電車愛好者嘅地方。」Eric解釋。
經營近4年，支出和盈利只是平手：「所有嘢都係自己出錢，我哋只喺同官方有合作關係、無任何資助，好彩山頂都畀個相宜價錢我哋，但我都用咗唔少積蓄。」為了其他愛好者，值得嗎？「始終係自己一直以嚟嘅愛好，既然鍾意得就有責任令更多人知，絕對值得！」Eric堅定的說。
出乎意料的漣漪
誰想到這個屬於電車迷的小天地，在頃刻間遭逢巨變：「1月嗰時收到商場通知要裝修同收番舖位，我心情好徬徨，當刻只係諗舖頭啲貨點算，因為唔只係得商品仲有展品，所以真係唔知點算。」Eric嘆氣。
自己多年來的心血化為烏有不可惜嗎？「都會有啲難過，咁啱嗰期仲係傾緊起故宮博物館，所以就諗點解政府寧願畀錢起呢啲，但本土文化反而容納唔到，我真係打定輸數㗎喇。」於是失望的Eric在電車館的Facebook專頁，上載了一張有緣再會的告別圖，卻一石激起千重浪。
大起與大落之間
「我完全無諗過有咁多人都覺得可惜，又有好多傳媒搵我，臨尾經營嗰個月有好多人特登上嚟買嘢、參觀，又有啲商場聯絡我話有啲鋪位咁，我一直都以為得我一個，大家令我覺得做呢件傻事並唔係我諗咁孤單。」Eric感慨道。
皇天總不負有心人，Eric在兩個多月前收到意想不到的好消息：「山頂廣場同我講話有一個舖位，比原本嘅大三分二，嗰下真係有啲唔真實嘅感覺，都好多謝山頂廣場支持，個心終於叫定落嚟，但又唔係完全放心，因為都要為新舖添置新嘅嘢。」
尚餘兩年壽命的這件「傻事」
不過，原來新店的合約只有兩年：「起碼呢件事令我知香港仲有空間去做呢啲傻事，但就算呢間舖延續唔到，其實都開心，因為得到好多朋友支持，令我覺得自己嘅努力白費。」Eric興奮地說。
沒多久，他思索了一下，又苦笑道：「但係如果文化館最終維持唔到，我都會覺得可惜，當然我會少咗一個寄託；但作為香港文化一部分嘅電車無咗一個據點，對香港嚟講又係咪一個損失呢？」
|
香港電車文化館 |
|
|
營業時間 |
11:30 - 20:00 |
|
地址 |
山頂廣場2樓5-7號店 |