【颱風山竹．有愛】大埔鷺鳥林雀屍處處　街坊合力營救生還雀B

山竹襲港，全港塌樹處處，樹上的生物何去何從？大埔廣福道有一個全港第二大的鷺鳥林，過去曾錄得有逾150個鳥巢，不過橫風橫雨之下，今日有市民發現，部分幼鳥被強風吹到地上，更有被塌下的樹枝壓中，雀屍處處。有街坊見狀，立即致電愛協，救起現場仍有氣息的雀鳥，希望牠們可以存活下來。

大埔街坊吳小姐表示，今早12時經過廣福道時，見到有至少5隻幼鳥橫屍路上，當時已有3名街坊圍在一起，一同致電漁護署和嘉道理農場，惟久久未能打通。「可能係畀大風由樹上吹落嚟，又有啲係畀樹枝壓住，有啲死雀B就瞓喺路中心，已開始有烏蠅『嬲住』！」吳小姐指，街坊對雀B死去感到心痛，因此一見到有數隻幼鳥「有聲氣」，就立即向愛協求助。

「SPCA一點左右嚟到，救走咗3隻雀，職員話都係暫時keep住啲雀B先，過兩日等嘉道理農場開返再送過去照顧。」吳小姐引述愛協職員表示，其中一隻體型較大的鷺鳥情況穩定，但其餘兩隻則要視乎牠們「捱唔捱到」。她又指，經過颱風侵襲，大家都希望雀鳥能平安無事，「街坊見到啲雀個位太近馬路，都有幫手趕佢哋行返入啲，大家都希望佢哋可以快啲冇事！」