新屋邨安泰、安達相繼入伙　觀塘區交通不勝負荷　朝朝逼爆巴士

秀茂坪安泰邨入伙後，附近合稱四順的順天邨、順安邨、順利邨、順緻苑，早前迎來第一個開學日。開學至今，巴士站每日大排長龍，大批街坊無法上車，令人擔心規劃不周將令區內交通不勝負荷，逼爆四順。

自2016年安達邨落成並入伙後，四順一帶今年又迎來了安泰邨，區內人口一下子上升不少，交通問題到開學日就無所遁形。觀塘區區議員莫建成在開學日後，持續觀察區內交通多日，發現順天邨的巴士總站在每日早上的繁忙時間，總是大排長龍，不少班次駛離總站時，已臨近逼爆。

「最經典就係27號巴士，去到順安(第二站)上多幾個人，已經爆咗，下個站順利邨啲街坊都唔使旨意上車。」這輛由順天開往旺角的巴士一直沒有減班之餘，更已加開了班次，惟每日早上等車的人數仍多不勝數。雖然未有確實數字，但莫建成指有不少候車的人並非四順居民，而是安達、安泰的街坊。

事實上，秀茂坪區內仍有一條213D路線，經安達、安泰邨來往旺角，但其設計卻有致命缺點：「過咗彩虹之後，基本上條路線同一樣，但佢嘅車費差唔多貴過27號一倍。」據了解，213D車費為$7.8，而27號則只需$4.9。正因如此，即使邨內已能輕鬆上巴士，不少街坊都寧願走到四順範圍候車：「有安泰街坊都話小朋友好慘，因為唔想遲到，要提早好多返學。」他認為，運輸署可開設一條流水式的短途路線，接載安達、安泰及四順學童至附近學校區域。

莫建成又指，即使街坊成功登上了往區外的長途巴士，不少人的目的地都不是距離較遠的地區，反而在彩虹、黃大仙這中途站下車。「希望運輸署可以加開一啲短途來往彩虹嘅巴士，做到分流，路程短架巴士返頭快之餘，啲人唔會逼晒上長途車。」他續道：「安達、安泰可以自給自足的話，四順就冇咁頭疼。」