【開學】孻女潛藏抑鬱一年　母逃避後面對事實　慶幸帶女求醫及時

有研究指，超過9成自殺者生前均曾患有精神病，但本地學童自殺個案中僅有近兩成被確診，相信部分自殺者潛藏精神健康問題。
媽媽阿May（化名）的女兒今年5月確診患有中度抑鬱症。她坦言，自女兒中四起已察覺對方情緒波動，抗拒上學，亦曾暗示輕生念頭。阿May說，當時抱著僥倖心態，「點會咁啱係我個女」，不肯面對女兒病情。一年後，女兒提出要求就醫，母女二人才共同正視問題。她慶幸女兒能及時得到情緒輔導及治療，「否則可能真係有悲劇發生。」
（學童精神健康報道，三之二）

無諗過自己個女會患有抑鬱症，確診個刻，真係好驚。

「無諗過自己個女會患有抑鬱症，確診個刻，真係好驚。」May回想當日心情，亦難掩心中憂慮，流下眼淚。

孻女拉五臟，May形容，一直與孻女關係緊密，不論生活大小事，女兒都會跟她傾訴，「佢有咩就會打嚟搵我求救。」她形容女兒學業自我要求高，性格敏感內向，故有時較易情緒低落。

女兒中四起情緒起伏大　校內突哭泣

不過，自女兒中四下學期起，May發覺她的情緒經常大起大落，學業壓力導致抗拒上學，曾有老師致電告知，女兒在班房內突然無故哭泣。她曾懷疑女兒患有情緒病，但她心存僥倖，選擇逃避問題，「點會咁啱係我個女！」她亦勸導女兒勿為小事惆悵，不過女兒卻感到不被理解，「然後收埋自己入房。」

阿媽，個病好似發燒感冒咁，你放心啦，會好番嘅。

等公立精神科最長2.5年​　轉向神託會求助​

直至今年5月，女兒在學校及網上認識到抑鬱症徵兆，回家後與母親傾訴，剖白心聲，「我覺得自己有啲問題，我想睇醫生。」女兒怕同學知道病情，故不樂意找校內社工救助，May立即四處尋求方法。

現時公立兒童及青少年精神科專科門診輪候時間達1.5年至2.5年；即使向私家精神科醫生求診，她稱要排期一個月。May最終在朋友轉介下，安排女兒到香港神託會求助，數天內獲安排面見精神科醫生，並確診患有中度抑鬱症。

她坦言，當時難以接受，「即刻眼濕濕」，數晚徹夜難眠，「對精神病有恐懼，唔知會唔會康復，擔心佢條路點行落去。」她經常提心吊膽，擔心病情會影響女兒，「會唔會有日出事。」不過女兒反過來安慰媽媽，May引述她說：「阿媽，個病好似發燒感冒咁，你放心啦，會好番嘅。」

照顧者宜拿捏關心程度　當「正常人」看待

幸好近三個月以來，女兒按時服藥，定期接受心理輔導治療，病情已逐漸改善，情緒安穩下來。May說，自己亦學會多體諒女兒，選擇少說話多聆聽，令她容易解開心中鬱結。

不過，她認為女兒更希望獲得「正常人」的看待，「當佢病，佢話會感覺冇用。」她舉例，在暑假期間，她就讓女兒參加青年交流團，到新疆絲綢之路旅行。縱然萬般憂心，媽媽亦要學會放手。一趟旅程過後，女兒身心顯得舒暢。

愛護與關心要收放自如，May說，要拿捏當中分寸並不容易，但亦必須如此，「其實有情緒病，心情會易起伏，但其實都係一個普通人，有時唔好特別看待。」回望過去，她認為應安排女兒更早求醫，以盡快解決情緒問題，「如果自己處理得唔好，就可能會有悲劇發生。」