【旺角商場】旺角潮流特區轉型　商戶望人流返轉頭

網上流傳旺角開業超過20年的潮流特區，湧現吉鋪潮，甚或說是即將結業，《香港01》記者走訪，發現潮特3樓有6成吉鋪，剩下的商鋪大多都在門外貼上搬遷告示，不少商鋪都表示將會於下月搬到2樓。有商戶指傳聞有大型連鎖店進駐，所以3樓所有店鋪將要全數撤離。

於3樓經營服裝店的容小姐就指，收到商場方面的通知，需要於下月初遷離現時的鋪位，她慨嘆3年前因旺角家樂坊重組，搬到來潮流特區，現時又要由300呎的鋪位，搬到2樓較小的鋪位，「冇辦法，唯有逼啲」，不過她希望搬到2樓會令生意好轉，「通常都係1、2樓最多人，3樓真係好少人行上嚟」，「我哋搬到樓下應該會好啲」。

於潮流特區經營服裝店多年的梁小姐亦指，潮流特區今非昔比，受網上購物潮流影響，與高峰期相比，近年店鋪的生意額下跌近3成，直言「一路都諗住唔想做，但有情意結，做咗十幾年，有一班熟客。」她又指曾經生意額只能「打個和」，除去開支，生意額只夠應付她與1名同事的基本薪金；她又希望如果有大型連鎖店進駐的傳聞屬實，可以帶動人流，刺激生意額。

市民梁小姐亦指商場的店鋪類型相近，「好似嚟嚟去去都係嗰啲鋪頭，冇咩特別，唔太吸引我去行」，她又認為網上購物更加方便，「方便，唔駛搵地方行，自己上網搵咩類型都有」。