【職場】辭職應該好來好去，但唔等於要任人搵笨！

一年容易又跳槽，嚟到年尾，相信部份讀者已經磨拳擦掌準備Send CV。想辭職想咗好耐，到真走嗰吓都堅係爽，而關於辭職，你一定聽過人講：「出嚟做嘢要好來好去」，如果呢句嘢嘅意思係「臨走唔好搞事」、「辭職都要做返好本身跟緊嘅嘢」、「未做完嘅野要整理好同好好交代」……咁我係完全同意！將心比己，我都希望隔離位同事辭職之時可以有責任心，將工作交帶清楚，但係，做人要有責任心唔等於做人要有奴性或任人搵笨。你辭職時老闆有無同你講過啲好荒謬嘅建議，希望你同佢「好來好去」？

「辭職？係咪做到悶？比多啲嘢你做，求你唔好走吖！」

老闆收到辭職信之後，只要個辭職者唔係一直對公司有害，多數都會叫佢入房傾傾試下留佢，另一方面，又除非你真係超幫得手，否則佢「留你」都只係例行公事，你唔洗太開心。點樣知老闆係真心留你定係例行工作？個答案真係好簡單好膚淺，睇佢加唔加你人工就知。

曾經有個舊同事Jennifer，喺同一間公司做咗幾年，日日的工作都係重重覆覆，Jennifer覺得自己喺老闆眼中係透明，無得試新嘢自然亦無機會上位，每年人工循例加2%，所以佢想襯後生想轉環境。

交完辭職信，老闆問Jennifer點解辭職，佢亦好坦白講覺得工作無挑戰性，感覺去到樽頸，日日返工都提唔起勁之類……老闆一聽到就好驚喜，離職係因為無挑戰性？咁我比多啲挑戰你咪得囉？嚟嚟嚟，其實公司都唔反對同事做多啲嘢，老闆就叫Jennifer返屋企諗下有咩Project想做，諗完之後交份Proposal出嚟大家傾下點樣可以做好佢！

老闆……人哋而家唔想撈，個應對竟然係加Workload。

正所謂，後生仔要捱下，同埋唔好咁計較，你話覺得份工無咩上位機會，咁公司比嘢你做，即係比機會你囉，收咗機會仲想加人工？咁你咪享用咗雙重優惠？餐廳Coupon都唔可以一餐用兩張啦。

一個月後走？請你先完成三個月後嘅工作

傾完一輪，老闆都只係用情感同真誠去留你，人工隻字不提，到最後你唔接受，都係堅決辭職嘅話，當然佢都唔能夠禁錮你，唯有叫你同HR計返清楚個離職日期啦。

而當老闆知道你個離職日後，佢就會變得好忙，忙住叫人搵下未來三個月公司有乜嘢事會發生？有咩Task可以「先做未來事而唔洗先出未來糧」？老闆絕對會盡佢最大能力希望迫使你一個月內做哂未來三個月嘅工作。至於交信嗰時喺房傾嗰啲情義、互相體諒，講乜嘢如果你肯留低，以後會對你好啲乜乜乜……佢一出房門口就唔記得哂，你唔係咁傻咁天真有一絲信過嗰翻說話呀？

當你返埋位諗下，咦，明明單嘢係隔離位同事Peter負責，而且件事係三個月後先發生，你交一交辭職信，老闆突然將個波拋咗比你，仲同你講：

「拍硬檔，你走咗，嚟緊公司會好忙，驚啲同事會好辛苦，你而家盡量完成之後嘅嘢先。」

你真係從來都唔知道原來老闆有擔心過「同事會好辛苦」，而你亦諗唔明點解佢有呢種擔心又唔自己解決，而你交比你——一個已辭職的人去解決，明明佢可以請人／加人工／減Workload去解決「同事好辛苦」，但佢無咁做到，佢選擇叫你做哂所有嘢，做到元氣盡傷地離職，因為你對佢嚟講，即將毫無利用價值，就算你做到又病又殘，都唔會影響到佢同公司。而最重要係佢相信你係一個有前途嘅打工仔，你一定會「好來好去」，幫得就幫。

好頭好尾唔係唔好，但自己做人無底線，就唔好問點解成日比人恰。

（本文純屬作者意見，不代表香港01立場。）