【廢青企管學】請成全「博炒」的人

航空公司裁員,一嘢炒600人,當中可能好多無辜打工仔好傷心,自問盡心盡力盡責求兩餐,瞓醒就無咗份工;更甚者有人對公司唔只講金仲一直講心,被炒個感覺就好似失戀咁:「我咁愛你,點解你突然間唔要我?我究竟做錯咗啲咩?」
電視劇對白話「嫁比份工好過嫁比衰男人」,此話一齣,身邊的確有幾個女強人對呢句對白表示認同(嚇親我),原來真繫好多人諗住同份工一生一世,但系而家現實就立即話你知嫁比份工並唔系你諗得咁穩陣,公司同你分手真系出一封信而已,你就連私人嘢都無機會執。但系感情嘅嘢,有人愛得投入難捨難離,另一方面亦有人瀟瀟灑灑覺得天涯何處無芳草,返工態度就係「炒我丫笨」,日日遲到、得閒「病」嚇、永遠怕蝕底驚做多嘢、同事有困難就企埋一邊食花生甚示踩多幾腳……偏偏呢啲「炒我丫笨」嘅人,可以寄生喺唔同公司,仲要炒極都炒唔到佢。
轉多幾份工就發現,勤勤力力同懶懶散散嘅人,好多時待遇都差唔多,好運嘅話,勤力嗰個可以每個月賺多三幾千人工,唔好運嘅話,懶懶散散嗰個仲做埋勤力嗰個人嘅上司,公平咩?痴線,你信職場上有公平架咩?當我遇到第一個懶散人而佢完全唔擔心比人炒嘅時候,我同自己講:「呢間公司唔炒人,養到啲人懶哂。佢入到呢間公司真繫好彩。」轉另一份工,又遇到同一類人,我再同自己講:「佢職位低,人工平,所以公司唔炒佢,當養只牛,佢真繫好彩。」然後到第三份工又再遇到,佢仲要系經理級,好啦,原來間間公司都有「炒不到的人」,呢班人都有一堆共通點……
唔介意其他人點睇自己
做人要得到快樂,「唔介意其他人點諗自己」真繫好重要,而呢樣嘢系要修練返嚟,唔系人人都做得到,簡單舉個例,你買咗件新衫,同你平時Style完全唔夾、Cutting又同你身型格格不入,但系唔買都買咗,你點都想著一次,點知著咗返工被一致劣評,同事A話:「譁原來你手臂咁粗。」、同事B話:「你今日做咩著到成棵樹咁呀?」,聽完呢啲說話,你仲敢唔敢再著件衫返工?如果你有猶豫,即系你都介意人地點睇自己。而嗰班「炒不到的人」真繫好睇得開,佢地好明白,自己日日遲到、扮病、推Job、做錯哂啲嘢、過咗Deadline都唔交嘢等等所帶比其他同事嘅痛苦,系唔會影響到自己嘅快樂。就算明知其他同事喺自己背後指指點點,但佢都系繼續懶、繼續Hea。
我有個朋友阿強,喺一間外資公司度做,佢條Team就得三個人,經理、阿強同埋一個「炒不到的人」阿金,阿金除咗每日遲到成粒鍾之外,仲要極唔獨立。外資公司當然系每次開會都用英文,要遷就返啲外國嚟嘅老闆,但阿金本身英文奇差,每次開會都聽唔明,然後散會就旨意阿強解釋返比佢聽,阿金見有人幫自己,就越來越依賴,完全無正視自己喺公司入面嘅溝通問題、無打算去進修,Email唔識打都系叫阿強幫手,完全無羞恥之心,理直氣壯講句「我唔識」就可以唔洗做。慢慢,阿強因為要照顧埋阿金,工作量就越來越多,而阿金就好安心咁每次開會都恰眼瞓、玩電話,放工約班豬朋狗友劈酒到天光,然後又唔知醒,又遲到或者Sick Leave。我問阿強點解佢公司可以接納到呢個人?好命嘅嘢真系葡萄都無用,佢地個經理系一個善良基督徒,對於阿金嘅惡行真系原諒佢七十個七次,擔心炒咗阿金會令佢生活有困難,唯有不斷勸勸勸……期望佢有一日會浪子回頭。
而阿金呢啲人又真系可以完全無半點唔好意思、無自我檢討,亦唔介意其他人話佢蠢呀廢呀,繼而無賴落去。我諗一諗,點解有啲男人可以打女人、不停滾都娶到老婆?因為佢唔介意人地話佢賤格,加上身邊有一個不斷縱容佢嘅傻豬。
膊頭要夠A
A字膊嘅基本功當然系推Job,「炒不到的人」對於Take唔Take一個Job,並唔系睇件事值唔值得做、對公司有無效益,而系睇「邊個叫我做」,同Grade叫佢做?推;隔離Team Head叫佢做?推;自己Team Head叫佢做,而個Team Head系唔惡嘅?推。就算個Job可以為公司帶嚟100萬收入都好啦,總之乜都唔上身,佢地有個好堅定嘅心態就係「炒我丫笨」。
基本功再鍛鍊上去就係將啲Job交比其他同事,交咗出去之後,個Job就完完全全系屬於同事嘅,話之對方做到嘔白泡都絕對唔會出手幫忙。今次個苦主系做HR嘅Jennifer,佢公司每年年頭都會搞春季大旅行比同事參加,Jennifer系一個新同事,上司當然系將呢啲豬頭骨Job交比佢啦,但Jennifer入職一個月左右,都未摸清公司運作、過往活動系點,甚至連活動Budget都未知,但上司交咗比佢之後就完全唔理,個態度系「唔關我事」,彷彿成件事唔系公事而系Jennifer自己要搞生日會咁,一啲Support都無,問意見又求其交啲廢話。佢上司就係「炒不到的人」,呢類人好叻將所有交咗出去嘅公事都當系同事嘅私事,「單嘢系你嘅」、「你做死系你嘅事」,不帶一點Team Spirit。
一間公司唔炒人唔等於就係好公司,因為「對工作上心嘅人」會被嗰班「炒不到的人」搞到好痛苦,話就話做好自己本份唔洗理啲衰人,但一齊做嘢,對方工作心態唔好,會令「上心人」被連累、被影響,長此落去又點會唔心灰想辭職?結果走嚇一個、走嚇又一個,「炒不到的人」就長Hea因年資而升職,由害同Grade變成害下屬。呢啲人嘅衰嘢點止咁少,一齊嚟我Facebook Page分享更多。
(文章純屬作者意見,不代表香港01立場。)
