【100毛上市．博評】毛記上市後嘅市值，有可能拍得住壹傳媒

點睇都好，毛記上市都係值得高興嘅事。個個新一代講到自己點叻點勁，鬧地產霸權呀廢老阻住佢上位呀。毛記，真係三個好兄弟創業成功嘅故事喎，仲要咁後生……我企圖做一個吃力不討好嘅壯舉，就係大預言。但我估，毛記上市後嘅市值，有可能拍得住壹傳媒（282）。

毛記葵涌（以下簡稱「毛記」），公司名都夠有意思，擺明幽「和記黃埔」一默。Just in case 腦細或其他毛記高層睇到呢篇嘢，不如諗下有冇得用返和記黃埔嘅13號上市編號？

毛記上市，好多人第一反應係「堅定流呀？」當然公司未過審批（但應該問題不大），亦可能因為市況（例如聽日就金融海嘯重臨）而上唔成，但，放得上港交所網站，初稿都好，點都冇得假。

點解咁多人第一反應唔多信，以為係假新聞？相信唔係因為腦細話過冇諗上市而家又反口，而係心諗，毛記何德何能，咁都上到市？

其實上市嘅嘢，話易唔易話難唔難，創業板固然一大堆唔知乜鬼公司，師奶都識講「啤殼」。即使係主板，喂，巴士賣廣告嘅RoadShow都上市N年啦。都唔使講個人喜好，天地良心，計影響力計地位，毛記唔會差好多啩？

對於一般香港人（包括我）嚟講，公司上市，佢哋最鍾意睇三樣嘢，亦係你在媒體必然會見到嘅三樣嘢：

1）嘩你間豆泥公司原來咁賺錢！

2）嘩你班友仔原來咁Q高人工

3）嘩原來佢住呢度嘩原來佢咁老 （上市公司規定要公開若干人等嘅地址同年紀）。

呢個同香港人八卦以及憎人富貴厭人窮嘅核心價值好吻合。

先講第一點，豆泥公司咁賺錢？

對，毛記真係幾賺錢。大把公司蝕住錢都上市（例如我批評過嘅美圖（1357）），大把公司改變全世界但都冇賺到錢，例如Uber，Tesla，Amazon。但毛記過去幾年都賺錢，仲要堂堂正正上主板，唔係上創業板喎。一年賺三千幾萬， 你估易？特別係人人話做媒體死路一條，紙媒又話難做，新媒體又話廣告費未跟到——毛記話畀你知，係你啲廣告費未跟到啫。至於佢有60%毛利同40%純利，相比之下，就唔算令人好意外。證明腦細開源節流有道，員工不妨扭下計叫加人工，或者至少呃返啲股票當糧出都好。

第二點， 你班友仔原來咁Q高人工？

我唔係毛孩，但以毛記嘅影響力，腦細等三人嘅人工，你真係覺得好過份？唔好咁啦，屯門樓都成萬蚊呎啦。補習名師林溢欣都幾千萬一年，腦細一年出百幾萬糧，好多咩？上市公司喎。況且，腦細早兩年一年拎緊五十萬咋，公司利潤升佢先加人工——大把上市公司高層話知公司蝕錢都照加人工啦，係咪？

至於上市前派息畀返股東（即係腦細們），係指定動作。聽落好似好賤，但諗真啲，人哋辛辛苦苦搞間公司上市，上市前派息係「報答」原有股東。新股東又可以freeride埋一份嘅，你班後來者咪好著數？總之，上市前還上市前，上市後還上市後，文件話晒畀你知分咗幾多，唔鍾意，唔好抽，願者上釣啫。況且，大把公司未上市借到一身債去派息，然後拎上市集資嘅街外錢去還。毛記呢？根本冇乜負債，最多只係啲應付帳項之類，完全冇借銀行錢。

再講一次，我唔係毛孩，我甚至昨晚先知腦細叫「徐家豪」。但點睇都好，毛記上市都值得高興嘅事。個個新一代講到自己點叻點勁，鬧地產霸權呀廢老阻住佢上位呀，毛記，真係三個好兄弟創業成功嘅故事喎，仲要咁後生。對，以前科網狂潮有過啲仲後生嘅上市公司主席，廿幾歲不可一世見到想兜巴星佢嗰啲。但三十幾歲公司上主板又唔係富二代嘅，好似真係冇邊幾個。

而且，毛記唔靠炒唔靠父蔭，真係一手一腳打出江山，人人話媒體冇得做，毛記示範畀老行尊睇個遊戲應該點玩。毛記係一間點嘅公司？其實同好多上市公司相比，佢哋嘅生意模式算係幾易明。上面張圖答到你，三瓣業務，數碼媒體，印刷媒體，其他媒體。

先講結論：數碼媒體即係你在Facebook或在佢website呀app呀見到的東西，最重要。印刷媒體，即係紙媒，100毛雜誌同黑紙，後者已摺埋，前者亦唔多重要，好快可以不理。最後一樣，其他，就係搞活動，同藝人管理，搞活動還好，藝人管理嗰部份，暫時又係近乎可以不理。

點解咁講？其實睇多張圖明晒。數碼媒體佔佢80%收入咁滯，亦係毛利率最高嘅。紙媒呢？佔10%收入，毛利率得22%左右，係數碼嘅三份一。「其他」就比較有趣，都佔大約10%收入，但毛利率夠晒高——但只係在搞活動，藝人管理就貢獻1%收入唔夠，一年收入50萬唔夠，17個藝人喎！ 可想而知啲藝人冇你想像中咁風光， 真係用like 當飯食咋。

更有趣嘅係，望埋幾年嘅變化。2015年毛記基本上都未有「數碼」（留意公司3月年結）呢樣東西，2016年數碼已經由零變到佔50%收入，而家去到80%。毛記嘅「轉型」，夠晒快手——當然佢哋唔係大台，少好多包袱，甚至由頭到尾都只係諗住專攻數碼，只係等時機成熟。

數碼業務嘅收入嚟自乜？好簡單，廣告。毛記有披露，五大客戶，一間係銀行，一間係電訊公司（好易估到係邊間啦），分別落咗400同200萬廣告。適逢而家好多傳統行業開始後知後覺，講網上行銷，唔落紙媒廣告，想做數碼。固然可以自己做，但，啲大大間跨國公司，試水又好，當幫下企業形象幫襯下本土年青人又好，拎幾百萬絶冇問題，咁毛記就食正條水啦。

我企圖做一個吃力不討好嘅壯舉，就係大預言。但我估，毛記上市後嘅市值，有可能拍得住壹傳媒（282）。壹傳媒好價賣埋壹週刊，但而家都唔夠10億市值。毛記而家一年都賺3600萬，10億市值講緊30倍市盈率。有啲貴，但未必算不可能——況且公司好可能仲有增長呢？招股文件初稿冇乜人有留意嘅細節，毛記有講4月5月收入差過舊年，但主要係因為舊年有活動搞（頒獎禮？）今年冇。咁，其實睇下毛記幾時正式上到市，如果出埋之後幾個月嘅數，就更加見真章了。

最後，大家最關心嘅問題，「抽唔抽得過」。簡單答你，唔知。原因好簡單，乜都未有，幾錢招股又唔知市值幾多又唔知，點答？100毛一股同100蚊一股就兩回事啦。但正正常常嚟講，我估可以支持下。都不為賺錢，亦唔好講到支持本土新一代咁偉大，凈係諗下去股東會就夠好玩啦。本人相信毛記嘅股東會點都會破格，只係睇呢台戲都分分鐘值回票價啦。

（本文純屬作者意見，不代表香港01立場。）