美圖秀秀根本冇賺過，亦唔會賺到錢

修圖軟件都收錢？傻的嗎？醜婦終須見家翁呀。畀錢執相app，咁不如畀錢去整容啦！

今次講返本行，講金融。放心，唔會悶親你。

小故事好簡單：

美圖公司（1357，以下簡稱美圖）星期四上市，搵咗成堆KOL（意見領袖）去港交所手機直播上市儀式，反應都幾好。不過，好似個個都係用iPhone，而唔係用美圖手機。對，美圖有出手機。

呢兩日「中環人」普遍講嘅，唔係葉劉參選，就係美國加息（連帶港股大跌）。比較少人討論但本人重點關注嘅，就係美圖成功上市。唔好搞錯，重點唔係代言人楊穎Angelababy去敲鐘，亦唔係佢大住肚著3吋高踭鞋，更加唔係「首席顏值官」（Angelababy嘅Title）到底係咩中文。

重點關注嘅係：到底邊個走去買？

美圖搞上市期間，傳媒討論有意無意聚焦在「香港股市終於又有科企啦」。的確，除左金融從業員外，好似所有香港人（甚至大陸人台灣人新加坡人）都會話你知，「香港經濟太單一，完全集中在金融地產」，食老本，跟唔上新經濟潮流。然後就會話你知，連香港股市都係側重金融地產，比唔上美國台灣甚至大陸咁多元化。

呢個講法其實冇錯，的確香港股市係冇乜科企。美國嘅科企霸王Apple， Google（其實係母公司Alphabet），Facebook，Tesla，Amazon等等固然全部留在美國上市。就連中國嘅阿里巴巴，新浪，微博等等，都全部去美國上市。細公司好多就留在深圳上。

香港股市有乜猛料科企？有，騰訊（700）咯，近18,000億市值（港紙，下同），當然夠資格。但，真係可能數多隻都冇了。第二係邊隻？可能你聽過「金山詞霸」啩？金山軟件（3888），200億市值左右，完全唔係嗰回事。除非你計埋聯想（992），或者瑞聲科技（2018）之類做硬件為主嘅公司。

美圖上市，就360億市值左右，疑似穩佔「第二大科企」寶座（點解「疑似」？陣間解）。而呢間公司，根本冇賺過錢。對，年年都蝕錢。唔止，間公司上市前仲係「淨負債」的，簡單嚟講，即係負資產，資不抵債。上完市cap咗舊錢就變返正數啦。

咁都上到市？仲要上主板？唔好鬧住，真係冇問題的。港交所規則寫到明，冇盈利唔緊要，市值夠40億，同時收入夠5億，一樣可以。美圖就兩樣都過到關。條文一早寫定，冇特權冇搬龍門。蝕錢淨負債唔緊要，有人肯買就得啦。

科企嘛，講夢想，唔好講賺錢咁銅臭，人人都話改變世界嘛。Tesla一樣年年蝕錢，Amazon之前亦蝕足N年，早排我寫過Uber，蝕錢速度前無古人。你總唔會話佢地係老千。對不？ 

問題係，美圖就唔係Tesla Amazon，甚至唔係騰訊阿里巴巴。

點解話美圖「疑似穩佔第二大科企寶座」？因為，其實你根本唔了解公司。講起美圖公司你諗起乜？你話簡單啦，美圖秀秀吖嘛。但其實招股書寫明，美圖公司97%嘅收入係嚟自硬件，即係美圖手機。你熟悉嘅美圖秀秀，頂多佔佢3%收入。其實公司似係賣手機多啲。

點解軟件收入咁少？因為，美圖秀秀係免費軟件嘛。可以點收錢？你收8蚊，人人即時轉用其他軟件。WhatsApp咁不可或缺，當時要收8蚊都大把人出嚟寫幾千字文鬧呀。一個普通修圖軟件想收錢？難過李嘉誠修到變李嘉欣。

賣廣告？美圖秀秀唔係WeChat唔係阿里巴巴。你可以日日花好多時間睇WeChat朋友圈，花好多時間淘寶，但，你會花幾多時間落個執相app？

硬件方面？不客氣講句，美圖手機更加係笑話一個。成個地球嘅手機市場， Apple食咗91%盈利，另外三間大陸公司（華為，Vivo，Oppo）各自有2%左右，剩低嘅就分埋最後嘅2%，仲有一堆蝕錢等執笠嘅。連Sony LG三星小米HTC都流晒血嘅市場，後起之秀嘅美圖手機可以賺到錢？你覺得符唔符合常識？但至少美圖手機有收入（但冇盈利），美圖秀秀軟件就收入都冇乜。

美圖嘅創始人兼董事長蔡文胜（繁體版招股書都係咁寫個「胜」字）一路強調用戶數目。的確，計用戶數目，美圖僅次於騰訊同阿里巴巴，而市值只係兩者嘅零頭。佢話有用戶最後就實賺到錢，Facebook Google騰訊都證明咗呢點。

問題係，美圖就真係唔係Facebook Google騰訊阿里巴巴嘛。人地嘅用戶有loyalty有stickiness，可能係因為型，因為死忠，因為個個都用，或者因為懶， 但你嘅用戶冇忠誠又冇黏性。個app一收錢就會走，而每日亦唔會用好耐。收唔到客戶錢，又收唔到廣告錢，咁，錢從何來？賣手機？你話呢？

（文章純屬作者意見，不代表香港01立場。）