【Sales唔易做．下】售貨員：「仙氣女神」拖不同男仔買衫畀錢
心理學研究指每次認識新朋友，不足7秒便足以產生第一印象。對服務業的人而言邏輯也許相反，客人踏進門口你只有不足數秒猜度他的心思。有人說讀書唔成先做sales（的確到這個年代，依然有家長行街時對身旁的孩子一板一眼地如此教訓），日日打開門口做生意，售貨員食鹽多過你食米。有錢人窮人怪人寸人見盡，任職時裝店約5年的Jessie教大家做售貨員的心法。
做Sales要：好演技
這家明明是女裝古著店，但不時卻見到男性闖進來。他們多數是買飾物手袋頸巾這些不分size的精品，送給她們心目中的女神。尤其這裏買的不是一般韓風時裝，男士覺得女神氣質過人獨一無二，挑禮物當然要別具心思才襯得起女神。
「有個男仔想揀個袋送畀女仔，請我們推介。那我請他形容一下個女仔係點。他說個女仔好有靚好有氣質、好有個性、長頭髮細細粒眼大大，係個好有內涵的文青，總之由佢口中講出來的係充滿仙氣、女神咁樣。於是佢揀了個袋就離開了，個袋都成千幾二千蚊。個男仔最多25歲，好斯文，好有教養，一睇就覺得係好仔。」
「點知第二日有個女仔同個朋友入來，見到一個同款嘅袋，問我哋幾錢。我們回答後，她轉過臉跟朋友說：『佢囉，送咗呢個同款的袋畀我，千幾蚊咋，我明明同佢講要個袋仔，以為佢會送個有牌子的袋畀我。』我即刻意識到，佢就係昨日個男仔口中的女神，點知睇勻全身，都睇唔出任何仙氣，咪一般港女，細細粒瘦瘦地咁，望落去得18歲左右。但由佢把口講得出嫌棄個袋，都好難認同佢有仙氣。個女仔問我，可唔可以換走個袋，我好怕會傷個男仔心，於是話無得換。」
做Sales要：選擇性記憶
做售貨員要有選擇性記憶，開心的東西要專心記起，有些時候要懂得選擇性失憶。例如短期內帶不同伴侶行街的顧客。
「去年暑假有個女仔，兩三個月間隔幾日就會過來，但她出現都有pattern：首先會一個人上來睇款、問價，當時有款四位數字的絲巾，她問了價無買，第二日就帶個男仔來買。下星期又一個人上來睇絲巾、問完價就走，第二日又帶個男仔來買，如是者她連續幾個星期出現，但每一次身旁的都係唔同男仔。」男朋友還是朋友？「同每一個人都有身體接觸，有拖手㗎。這些情況，你每一次見到佢，都要提醒自己同佢係第一次來、無見過，扮晒唔識佢。千萬不能漏半點口分，提起『你上次睇／買條頸巾』，千祈唔得。每一次佢都係突然爆出來、偶遇。」
Jessie從做售貨員面對客人，領會了「人生若只如初見」的道理。
到今天，的確還有客人拖著子女走入時裝店，沒有光顧走拂袖離去前，卻向身旁的孩子說：「要畀心機讀書，如果唔係好似佢哋咁成世賣衫。」這是Jessie唯一一次想衝出去打人的經驗。有人以為她學歷不高見識少，佔地一間古著店大小的社會大學，每天為她帶來一位又一位不同階層、不同背景的「老師」。