【社區人．訪】西裝店藏數百恐怖公仔　收藏家：佢哋好得意

站在西裝訂製店門前，從門外的小窗窺看室內，第一眼看見的並非西裝、布料，而是一隻隻經典恐怖電影角色的木偶。
詭娃安娜貝爾、《恐懼鬥室》的Jigsaw、《歡迎光臨死亡小鎮》的腹語人偶Billy、舊版《小丑回魂》的恐怖小丑 ，一隻隻恐怖公仔一字形排開，活像一套集眾家之大成的大雜燴恐怖片，為店內添上一抹詭異的氣氛。
這堆「鬼娃」中的主人，是36歲的西裝店東主陳永尉(Bowie)。他對鬼娃超級著迷，儲有數百隻恐怖公仔，連身上的T恤圖案，也是電影《娃鬼回魂》中的Chucky。
「最近上網見到有1:1嘅詭修女，我好想買！」陳永尉說。一聊起近日的新目標，這個鬼娃癡即興奮得手舞足蹈。
攝影：梁鵬威

他舖內和家中的藏品，迷你品的又有，1比1大小的又有，至於總共儲了多少隻這些怪公仔，陳永尉說已記不清，但粗略估計有近400隻。把這些恐怖公仔當成寶物，有人說他怪，但他亳不介意。

我是個怪小孩

當同儕都在玩玩具車、「煮飯仔」，陳永尉已經玩殭屍、骷髏這些級數的玩物，說得好聽一點，他的喜好較特別，但說白了，就是怪。「我啲親戚全部都話我怪，重同我阿爸、阿媽講，擔心我長大咗會唔會有問題。」不過，開明的父母不以為然，他生日時甚至「投其所好」，送了一套《捉鬼敢死隊》的影碟給他作生日禮物：「講緊係幾歲喎！𠵱家我哋覺得《捉鬼敢死隊》好幼稚，但係幾歲嘅小朋友睇係好怪。」

陳永尉說，他第一隻鬼娃，是朋友送贈的迷你活死人娃娃，至於在甚麼場合收到，已經記不起。「我發覺原來自己真係好鍾意（佢哋），覺得佢哋好得意，於是愈買愈多，大隻嘅又買，細隻嘅又買。」說着，他打斷了記者正想問的問題：「人哋成日問我：『你最鍾意邊隻呀？』其實你唔好問我啦！我隻隻都鍾意。」

我怪，又如何？

他從迷你版公仔開始儲，再慢慢「升呢」，到後來連大木偶也開始收藏，陳永尉拿起放在店內櫃台前的Jigsaw（《恐懼鬥室》系列電影的角色），說着和它們「邂逅」的經過。「佢哋係由一間美國公司製造，造得好似電影入面嘅角色。一隻都差唔多兩萬蚊，嗰時候一次過買咗4隻......我坐喺電腦前面掙扎咗好耐，最後左手捉住揸滑鼠嘅右手，㩒咗落付款個掣，然後好冷靜咁打電話去銀行：『喂？唔該我想做分期(付款)。』」

400隻收藏，公仔多到連自己住的單位也放不下，「加加埋埋」花近6位數字。「好多身邊嘅人、親戚都話：『唔好嘥晒啲錢啦！使唔使幾百蚊一隻？』我都唔夠膽講有啲成兩萬蚊一隻。」

對同齡的朋友來說，陳永尉是怪人。「同我同年嘅朋友，可能都結咗婚、生咗仔、供緊樓，做緊啲好正經嘅嘢。見我重玩緊呢啲野，啲人咪覺得我怪囉。」旁人不明白，只因不了解他對恐怖公仔的愛有多深：「我唔係好鍾意嘅話，都唔會洗咁多錢、用咁多空間咁樣擺。佢哋講我都係笑下就算，你唔會明白我。」

鐘情中式紙紮

旁人不了解陳永尉也不打緊，最重要太太能理解。太太對他的喜好接受程度相當高，拍婚紗照時她甚至提出在婚紗上掛上他的收藏，真正「夫唱婦隨」。惟有個他鍾愛的公仔，太太未能接受，就是那對金童玉女紙紮公仔。

「中國傳統紙紮公仔，我好鍾意㗎！」說起中式紙紮，陳永尉的兩眼彷似發了光，興奮地說去年委託了一位因創作出紙紮金童玉女燈籠而成網上熱話的紋身師，根據他們夫婦的樣子，度身訂造一對紙紮燈籠。

「我老婆成日望住就話頭痛，又話覺得唔吉利。」這對和他們一模一樣的紙紮公仔，更引起了岳父的注意：「佢係好傳統嘅人，上到嚟望一望，問：『咩事咁樣㗎？』」面對此問題，兩夫婦唯有「笑而不語」，但其實妻子心裏笑不出來。「有日佢趁我唔喺度，包埋對公仔掉咗。」笑說起這事，陳永尉面上並無怒色：「如果唔係我老婆唔鍾意，我會儲到成屋都係！」

無可能人人欣賞

因為「土地問題」，部分收藏要放置在西裝店內。問他為何會選擇放在這裡，他說：「我覺得開心囉！返工咁悶。」陳永尉一臉輕鬆地解釋，道：「返到嚟覺得好舒服、好鍾意，好似日日都係萬聖節咁。」

有時客人初來，也會被店內的公仔「嚇一嚇」，或者用奇異的目光，打量這間毫不普通的西裝店，不過大部分人很快就習慣了這「恐怖」的氣氛。陳永尉坦言有親友曾勸說，這樣的擺設或會令訂造結婚禮服的客人覺得不吉利，但他覺得「唔欣賞都冇計」：「我擺咩先可以令到個個人都欣賞？冇可能㗎嘛。」