【來稿】「無國界759」救助美食沙漠兒童　嶺南生：7蚊咖喱救咗我

759阿信屋曾經拯救無數貧苦大學生。農曆七月鬼門關開，嶺南死老鬼（編按：老鬼為大學畢業生的自稱）想悼念自己逝去的U life同青春。
撰文：虎地窮拎

沙漠中的綠洲：13蚊自組日式咖喱飯

要喺虎地生存，首先你要識滿足唐君毅老先生口中的生物邏輯層，即係喺食物沙漠解決三餐。以前嶺南得一間「出色」頹can同嶺南樓（酒樓），方圓百里內的富泰商場，都有間麥記、大快活同幾間貴價茶記。當你食厭廿蚊餐又唔想畀40蚊食茶記，又未夠鐘買宵夜，想買頹麵返hall食啦，點知誠哥間百佳又唔生性，次次收銀條隊排到出九龍，餓到胃出血都未畀到錢。

呢個時候，面對頹can三星飯，瘦肉精午餐肉、大陸腸、太陽蛋同幾條冷菜組成的狗也不X的頹飯，759阿信屋可謂幫一眾窮拎提供營多以外的alternative U  life。嶺南勢力範圍有兩間759阿信屋，一間喺富泰，一間喺兆康西鐵站。以前759阿信屋逢五、六、日特價，係入貨好時機，嶺南生就齊齊去搶購7蚊包嘅即食咖喱，再配6蚊叮叮韓國白飯，或者3蚊包嘅烏冬，豪啲可以牛肉加蔥花，幻想自己喺日本食緊咖喱烏冬，但分別只係我10蚊就買到，外面就賣緊百幾蚊。不過，癡線佬如我，都唔夠個屈蛇roommate癲，佢一包咖喱食兩餐，除開即係9蚊餐。我都只能大叫一句：OK！You win！

救苦救難759阿信屋

窮拎大學生要喺香港生存，相傳食垃圾食物係目前最有效的方法。當年陳智思係嶺南校董會主席，後尾做埋降低食物中鹽和糖委員會主席。其實我唔係無試過，我試過安份守己，降低食物中鹽和糖，我試過，我真係試過！但又要快又要平，仲要健康，又邊有咁理想？

反正樓又買唔到，果斷買堆垃圾零食治癒自己仲實際，759阿信屋有時仲有特價德國黑啤、生力、1664、仲有酒鬼如我都飲唔落嘅ICE。想當年，1664喺百佳賣$16.9，阿信屋最平賣到$8；合味道大杯裝誠哥賣十幾蚊，林生賣7個半。但最出色都係家庭裝百力滋，PK賣$22.9，759賣$15.9，呢幾年百力滋價格都好少重上20蚊高位，可能林生係近10年最直接挑戰誠哥同怡和超市壟斷的香港仔。

林生，愛國如你10年內3次要求加入共產黨，你都爲守住張香港身份證而無懼被拒入黨，最終退求其次加入民建聯。但無論政治立場點唔同都好，你曾經拯救過無數貧苦大學生，功德好比無數捐助大學的有錢佬。餵飼廢青之恩，沒齒難忘。

林生，R.I.P.，一路好走。